امام بخاری روایت کرتے ہیں کہ ہمیں بشر بن مرحوم نے حدیث بیان کی‘ انہوں نے کہا: ہمیں حاتم بن اسماعیل نے حدیث بیان کی از یزید بن ابی عبید از حضرت سلمۃ رضی اللہ عنہ‘ وہ بیان کرتے ہیں کہ
لوگوں کے زادِ راہ کم ہو گئے اور وہ بھوک کے رہنے کے قریب تھے تو وہ اپنے اونٹوں کو ذبح کرنے کی (اجازت لینے کے لیے) نبی صلی اللہ علیہ وسلم کے پاس آئے تو آپ نے ان کو اجازت دے دی‘ پھر ان کی حضرت عمر رضی اللہ عنہ سے ملاقات ہوئی تو انہوں نے حضرت عمر کو یہ واقعہ بتایا تو انہوں نے کہا: پھر بعد میں تمہاری بقاء کیسے ہوگی! تب حضرت عمر‘ نبی صلی اللہ علیہ وسلم کے پاس گئے اور عرض کیا: یا رسول اللہ! اونٹوں کو ذبح کرنے کے بعد پھر بعد میں ان کی بقاء کیسے ہوگی؟ تب رسول اللہ صلی اللہ علیہ وسلم نے فرمایا کہ لوگوں میں اعلان کر دو کہ وہ اپنے اپنے بچے ہوئے زادِ راہ لے آئیں‘ پھر آپ نے دعا کی اور طعام پر برکت کی (خصوصی) دعا کی‘ پھر آپ نے لوگوں کے برتن منگائے‘ پھر لوگوں نے مٹھی بھر بھر کر (ان برتنوں میں زادِ راہ سے ڈالا) حتیٰ کہ وہ فارغ ہو گئے‘ تب رسول اللہ صلی اللہ علیہ وسلم نے فرمایا: میں گواہی دیتا ہوں کہ اللہ کے سوا کوئی عبادت کا مستحق نہیں ہے اور میں اللہ کا رسول ہوں۔
Reference: Sahih Al Bukhari 2982