ابن جریج نے کہا: اور مجھے حسن بن مسلم نے خبر دی از طاؤس از حضرت ابن عباس رضی اللہ عنہما، انہوں نے بیان کیا:

میں عید کے دن نبی صلی اللہ علیہ وسلم، حضرت ابوبکر، حضرت عمر اور حضرت عثمان رضی اللہ عنہم کے ساتھ حاضر ہوا، وہ سب خطبہ دینے سے پہلے نماز پڑھتے تھے، پھر خطبہ دیتے تھے، اس کے بعد نبی صلی اللہ علیہ وسلم وہاں سے نکلے، گویا کہ میں آپ کی طرف دیکھ رہا ہوں، آپ لوگوں کو اپنے ہاتھ کے اشارے سے بٹھا رہے تھے، پھر آپ صفوں کو چیرتے ہوئے خواتین کے پاس آئے، حضرت بلال آپ کے ساتھ تھے، آپ نے یہ آیت پڑھی: اے رسول مکرم! جب مسلمان عورتیں آپ کے پاس بیعت کے لیے آئیں۔ (الممتحنہ: ۱۲) پھر آپ نے فرمایا: کیا تم ان باتوں پر قائم رہو گی! کسی عورت نے کوئی جواب نہیں دیا، صرف ایک عورت نے کہا: جی ہاں! حسن بن مسلم کو معلوم نہیں تھا وہ عورت کون تھی، آپ نے فرمایا: اچھا! تو پھر تم صدقہ دو، حضرت بلال نے کپڑا بچھایا اور کہا: لاؤ! ڈالو تم پر میرے ماں اور باپ قربان ہوں، وہ عورتیں حضرت بلال کے کپڑے میں چھلے اور انگوٹھیاں ڈالنے لگیں۔

امام عبد الرزاق نے کہا: اس حدیث میں جو "فتخ" کا لفظ ہے، اس سے بڑے چھلے مراد ہیں جو زمانہ جاہلیت میں عورتیں پہنتی تھیں۔