(امام بخاری روایت کرتے ہیں) : ہمیں ابوالیمان نے حدیث بیان کی ، انہوں نے کہا : ہمیں شعیب نے خبر دی از الزہری انہوں نے کہا : مجھے سالم بن عبداللہ نے خبر دی کہ حضرت عبداللہ بن عمر رضی اللہ عنہما نے کہا کہ

حضرت عمر نے ایک موٹا ریشمی جبہ لیا جو بازار میں بک رہا تھا ، وہ اس کو لے کر رسول اللہ صلی اللہ علیہ وسلم کے پاس آئے اور کہا : یا رسول اللہ ! اس کو خرید لیجئے اور عید کے دن اور جب کوئی وفد ملنے کے لیے آئے تو اس کو زینت کے لیے پہن لیں ، تو رسول اللہ صلی اللہ علیہ وسلم نے ان سے فرمایا : یہ لباس تو ان لوگوں کا ہے جن کا (آخرت میں) کوئی حصہ نہیں ہوتا ، پھر جب تک اللہ نے چاہا حضرت عمر ٹھہرے رہے ، پھر رسول اللہ صلی اللہ علیہ وسلم نے ان کی طرف ایک ریشمی جبہ بھیجا ، حضرت عمر اس کو لے کر رسول اللہ صلی اللہ علیہ وسلم کے پاس آئے ، پس کہا : یا رسول اللہ ! آپ نے فرمایا تھا : یہ ان لوگوں کا لباس ہے جن کا آخرت میں کوئی حصہ نہیں ہے ، حالانکہ آپ نے میری طرف یہ جبہ بھیجا ہے ! تب رسول اللہ صلی اللہ علیہ وسلم نے فرمایا : تم اس کو فروخت کر دو اور اس سے اپنی ضرورت کو پورا کرو ۔