امام بخاری روایت کرتے ہیں: ہمیں اسماعیل بن ابان نے حدیث بیان کی، انہوں نے کہا: ہمیں ابن الغسیل نے حدیث بیان کی، انہوں نے کہا: ہمیں عکرمہ نے حدیث بیان کی از حضرت ابن عباس رضی اللہ عنہما، انہوں نے کہا:

نبی صلی اللہ علیہ وسلم منبر پر چڑھے اور یہ آخری مجلس تھی جس میں آپ بیٹھے، اس وقت آپ نے ایک بڑی چادر اپنے کندھوں پر ڈالی ہوئی تھی اور اپنے سر پر عمامہ باندھا ہوا تھا جو تیل سے چکنا ہو چکا تھا، آپ نے اللہ کی حمد کی اور اس کی ثناء کی پھر آپ نے فرمایا: اے لوگو! میرے قریب آ جاؤ، سو لوگ آپ کی طرف آ گئے، پھر آپ نے فرمایا: اما بعد (حمد و ثناء کے بعد) انصار کا یہ قبیلہ کم ہوتا جائے گا اور (دوسرے) لوگ زیادہ ہوتے جائیں گے، پس (سیدنا) محمد صلی اللہ علیہ وسلم کی امت میں سے جو شخص کسی منصب کا والی ہو اور وہ کسی کو ضرر پہنچانے یا کسی کو نفع دینے کا اختیار رکھتا ہو تو وہ انصار میں سے نیکوں کی نیکی کو قبول کرے اور ان میں سے خطا کاروں کی خطاء سے درگزر کرے۔