(امام بخاری روایت کرتے ہیں): ہمیں معلیٰ بن اسد نے حدیث بیان کی، انہوں نے کہا: ہمیں وہیب نے حدیث بیان کی از ایوب از ابی قلابہ، انہوں نے کہا:

ہمارے پاس حضرت مالک بن الحویرث رضی اللہ عنہ آئے، پس انہوں نے ہم کو ہماری اس مسجد میں نماز پڑھائی، پھر انہوں نے کہا: میں تم کو نماز پڑھا رہا ہوں اور میرا ارادہ نماز پڑھانے کا نہیں ہے، لیکن میرا ارادہ یہ ہے کہ میں تم کو یہ دکھاؤں کہ میں نے نبی صلی اللہ علیہ وسلم کو کس طرح نماز پڑھتے ہوئے دیکھا ہے۔ ایوب نے کہا: پس میں نے ابو قلابہ سے پوچھا: اور ان کی نماز کس طرح تھی؟ انہوں نے کہا: ہمارے اس بوڑھے شخص کی نماز کی طرح اور ان کی اس سے مراد حضرت عمرو بن سلمہ تھے۔ ایوب نے کہا: اور وہ بوڑھے شخص پوری تکبیر پڑھتے تھے اور جب وہ دوسرے سجدہ سے سر اٹھاتے تو بیٹھ جاتے اور زمین پر ٹیک لگاتے، پھر کھڑے ہوتے۔