(امام بخاری روایت کرتے ہیں): ہمیں محمد بن بشار نے حدیث بیان کی‘ انہوں نے کہا: ہمیں یحییٰ نے حدیث بیان کی از عبید اللہ‘ انہوں نے کہا: مجھے سعید بن ابی سعید نے حدیث بیان کی از والد خود از حضرت ابو ہریرہ رضی اللہ عنہ کہ

رسول اللہ صلی اللہ علیہ وسلم مسجد میں داخل ہوئے‘ پھر ایک شخص داخل ہوا‘ پس اس نے نماز پڑھی‘ پھر نبی صلی اللہ علیہ وسلم کو سلام کیا‘ پس آپ نے سلام کا جواب دیا اور فرمایا: لوٹ جاؤ‘ پھر نماز پڑھو کیونکہ تم نے نماز نہیں پڑھی‘ سو وہ لوٹ گیا‘ پھر اس نے اس طرح نماز پڑھی جس طرح پہلے نماز پڑھی تھی‘ پھر نبی صلی اللہ علیہ وسلم کو سلام کیا‘ آپ نے فرمایا: لوٹ جاؤ‘ پس نماز پڑھو کیونکہ تم نے نماز نہیں پڑھی‘ یہ تین مرتبہ ہوا‘ پھر اس شخص نے کہا: اس ذات کی قسم جس نے آپ کو حق دے کر بھیجا ہے! میں اس سے بہتر طریقہ سے نماز نہیں پڑھ سکتا‘ سو آپ مجھے تعلیم دیجئے‘ پس آپ نے فرمایا: جب تم نماز کی طرف کھڑے ہو‘ پس اللہ اکبر کہو‘ پھر تم جتنا قرآن آسانی کے ساتھ پڑھ سکتے ہو اتنا قرآن پڑھو‘ پھر تم رکوع کرو حتیٰ کہ تم اطمینان سے رکوع کرو‘ پھر تم رکوع سے سر اٹھاؤ حتیٰ کہ تم سیدھے کھڑے ہو جاؤ‘ پھر تم سجدہ کرو حتیٰ کہ تم اطمینان سے سجدہ کرو‘ پھر تم سجدہ سے سر اٹھاؤ حتیٰ کہ تم اطمینان سے بیٹھ جاؤ اور اپنی پوری نماز میں اسی طرح کرو۔