(امام بخاری روایت کرتے ہیں): ہمیں عبداللہ بن عبدالوہاب نے حدیث بیان کی، انہوں نے کہا: ہمیں حماد بن زید نے حدیث بیان کی، انہوں نے کہا: ہمیں عبدالحمید صاحب الزیادی نے حدیث بیان کی، انہوں نے کہا: میں نے عبداللہ بن الحارث سے سنا، انہوں نے کہا:

ہمیں حضرت ابن عباس رضی اللہ عنہما نے کیچڑ والے دن میں خطبہ دیا، اور مؤذن جب ”حی علی الصلوٰۃ“ پر پہنچا تو اسے حکم دیا کہ وہ یہ کہے: ”گھروں میں نماز پڑھو“ پس لوگوں نے ایک دوسرے کی طرف دیکھا، گویا کہ انہوں نے اس کا انکار کیا، حضرت ابن عباس نے فرمایا: گویا کہ تم اس کا انکار کر رہے ہو، حالانکہ اس کام کو انہوں نے کیا ہے جو مجھ سے افضل تھے، یعنی نبی صلی اللہ علیہ وآلہ وسلم نے اور بے شک یہ کام عزیمت ہے اور میں نے اس کو ناپسند کیا کہ تمہیں حرج میں ڈالوں۔

اور از حماد از عاصم از عبداللہ بن الحارث از حضرت ابن عباس رضی اللہ عنہما اس کی مثل مروی ہے، البتہ انہوں نے یہ کہا کہ میں نے اس کو ناپسند کیا کہ میں تم کو مشقت میں مبتلا کروں اور تم اس حال میں آؤ کہ تم گھٹنوں تک کیچڑ میں لتھڑے ہوئے ہو۔