امام بخاری روایت کرتے ہیں: ہمیں محمد بن العلاء نے حدیث بیان کی‘ انہوں نے کہا: ہمیں ابواسامہ نے خبر دی از برید از ابی بردہ از حضرت ابوموسیٰ رضی اللہ عنہ‘ وہ بیان کرتے ہیں کہ

میں اور میرے وہ اصحاب جو میرے ساتھ کشتی میں آئے‘ بطحان کے کھلے میدان میں اترے اور نبی صلی اللہ علیہ وآلہ وسلم مدینہ میں تھے‘ پس ہر رات ان میں سے ایک جماعت باری باری عشاء کی نماز میں نبی صلی اللہ علیہ وآلہ وسلم کے پاس حاضر ہوتی تھی‘ پس ایک دن ہمیں اتفاق ہوا‘ میں اور میرے اصحاب نبی صلی اللہ علیہ وآلہ وسلم کے پاس گئے اور آپ گھر میں کسی کام میں مشغول تھے‘ آپ نے نماز میں تاخیر کر دی حتیٰ کہ آدھی رات ہوگئی‘ پھر نبی صلی اللہ علیہ وآلہ وسلم باہر نکلے‘ پس آپ نے ان کو نماز پڑھائی‘ پس جب آپ نے نماز پڑھا دی تو آپ نے حاضرین سے فرمایا: ٹھہرو! خوش خبری سنو! اللہ تعالیٰ کی نعمتوں میں سے تم پر ایک نعمت یہ ہے کہ اس وقت میں تمہارے سوا اور کوئی شخص نماز نہیں پڑھ رہا‘ یا فرمایا: اس وقت تمہارے سوا اور کسی نے نماز نہیں پڑھی‘ ہمیں یاد نہیں کہ آپ نے ان میں سے کون سی بات فرمائی‘ حضرت ابوموسیٰ نے کہا: ہم رسول اللہ صلی اللہ علیہ وآلہ وسلم سے یہ بات سن کر خوشی خوشی واپس گئے۔