امام بخاری روایت کرتے ہیں: ہمیں حفص بن عمر نے حدیث بیان کی‘ انہوں نے کہا: ہمیں شعبہ نے حدیث بیان کی از ابی المنہال از حضرت ابی برزہ رضی اللہ عنہ کہ

نبی صلی اللہ علیہ وآلہ وسلم صبح کی نماز پڑھتے اور ہم میں سے کوئی شخص اپنے ساتھ بیٹھے ہوئے کو پہچان لیتا تھا اور آپ اس نماز میں ساٹھ سے لے کر سو آیات پڑھتے تھے اور آپ ظہر کی نماز اس وقت پڑھتے تھے جب سورج زائل ہو جاتا تھا اور آپ عصر کی نماز اس وقت پڑھتے تھے کہ ہم میں سے کوئی شخص مدینہ کے آخر میں جا کر واپس آتا اور سورج چمک رہا ہوتا تھا‘ ابوالمنہال نے کہا: میں بھول گیا کہ حضرت ابو برزہ نے مغرب کے متعلق کیا فرمایا تھا اور آپ عشاء کی نماز کو تہائی رات تک مؤخر کرنے کی‘ پھر آدھی رات تک مؤخر کرنے کی کوئی پرواہ نہیں کرتے تھے۔

اور معاذ نے کہا اور شعبہ نے کہا: پھر میری حضرت ابو برزہ سے ملاقات ہوئی تو انہوں نے کہا: یا تہائی رات تک۔