امام بخاری روایت کرتے ہیں: ہمیں ابوالیمان نے حدیث بیان کی‘ انہوں نے کہا: ہمیں شعیب نے خبر دی از الزہری‘ انہوں نے کہا: مجھے حضرت انس بن مالک رضی اللہ عنہ نے خبر دی کہ

جب سورج (آسمان کے وسط سے) زائل ہو گیا تو نبی صلی اللہ علیہ وآلہ وسلم نے ظہر پڑھی‘ پھر آپ نے منبر پر کھڑے ہو کر قیامت کا ذکر کیا‘ پھر آپ نے اس میں بڑے بڑے واقعات کا ذکر فرمایا‘ پھر آپ نے فرمایا: جو کسی چیز کے متعلق سوال کرنا چاہتا ہو وہ سوال کرے‘ تم مجھ سے جس چیز کے متعلق بھی سوال کرو گے میں تم کو اس کی خبر دوں گا‘ جب تک کہ میں اس مقام میں ہوں‘ پھر اکثر لوگوں نے رونا شروع کر دیا اور آپ نے بہت زیادہ فرمایا: مجھ سے سوال کرو‘ پھر حضرت عبداللہ بن حذافہ السہمی رضی اللہ عنہ کھڑے ہوئے اور کہا: میرا باپ کون ہے؟ آپ نے فرمایا: تمہارا باپ حذافہ ہے‘ پھر آپ بار بار فرماتے رہے کہ مجھ سے سوال کرو‘ پھر حضرت عمر رضی اللہ عنہ دوزانو بیٹھ گئے‘ پھر کہا: ہم اللہ کو رب مان کر راضی ہیں اور اسلام کو دین مان کر راضی ہیں اور (سیدنا) محمد (صلی اللہ علیہ وآلہ وسلم) کو نبی مان کر راضی ہیں‘ تب آپ خاموش ہو گئے‘ پھر فرمایا: ابھی اس دیوار کے وسط میں میرے سامنے جنت اور دوزخ پیش کی گئی‘ پس میں نے خیر اور شر کی مثل (اس سے پہلے) نہیں دیکھی۔