امام بخاری روایت کرتے ہیں: ہمیں احمد بن اسحاق السورماری نے حدیث بیان کی‘ انہوں نے کہا: ہمیں عبیداللہ بن موسیٰ نے حدیث بیان کی‘ انہوں نے کہا: ہمیں اسرائیل نے حدیث بیان کی از ابی اسحاق از عمرو بن میمون از حضرت عبداللہ بن مسعود رضی اللہ عنہ انہوں نے کہا کہ

جس وقت رسول اللہ صلی اللہ علیہ وسلم کعبہ کے پاس کھڑے ہوئے نماز پڑھ رہے تھے اور (کفار) قریش کی ایک جماعت اپنی مجالس میں بیٹھی ہوئی تھی‘ اس وقت ان میں سے کسی کہنے والے نے کہا: کیا تم اس ریا کار کی طرف نہیں دیکھ رہے؟ تم میں سے کوئی شخص آل فلاں کی اونٹنی کی طرف جائے اور اس کے گوبر اور خون اور اس کی بچہ دانی (اس سے مجازاً اوجھڑی مراد ہے) لے آئے‘ پھر اس کو مہلت دے حتیٰ کہ جب یہ سجدہ میں جائیں تو اس کو ان کے دونوں کندھوں کے درمیان رکھ دے‘ پھر جو ان میں سب سے زیادہ بدبخت تھا‘ وہ اٹھا اور جب رسول اللہ صلی اللہ علیہ وسلم نے سجدہ کیا تو اس نے اس اوجھڑی کو آپ کے دونوں کندھوں کے درمیان رکھ دیا اور نبی صلی اللہ علیہ وسلم سجدہ میں برقرار رہے‘ سو وہ کفار ہنستے رہے اور ہنستے ہوئے ایک دوسرے پر گر رہے تھے‘ پھر کوئی جانے والا حضرت سیدہ فاطمہ علیہا السلام کے پاس گیا‘ اور وہ کم سن لڑکی تھیں‘ پس وہ دوڑتی ہوئی آئیں اور نبی صلی اللہ علیہ وسلم (بہ دستور) سجدہ میں تھے‘ حتیٰ کہ انہوں نے اس اوجھڑی کو آپ کے اوپر سے اٹھا کر پھینک دیا‘ اور کفار قریش کی طرف متوجہ ہو کر ان کو سخت سست کہا‘ جب رسول اللہ صلی اللہ علیہ وسلم نے نماز ادا کر لی تو آپ نے ان کے خلاف دعاء ضرر کی: اے اللہ! قریش کو پکڑ لے‘ اے اللہ! قریش کو پکڑ لے‘ اے اللہ! قریش کو پکڑ لے‘ پھر ان کے نام لیے: اے اللہ! عمرو بن ہشام کو ہلاک کر دے‘ اور عتبہ بن ربیعہ کو اور شیبہ بن ربیعہ کو اور ولید بن عتبہ کو اور امیہ بن خلف کو اور عقبہ بن ابی معیط کو اور عمارہ بن الولید کو۔ حضرت عبداللہ بن مسعود رضی اللہ عنہ بیان کرتے ہیں: پس اللہ کی قسم! غزوۂ بدر کے دن میں نے دیکھا یہ سب زمین پر (مردہ) پڑے ہوئے تھے‘ پھر ان سب کو گھسیٹ کر بدر کے کنویں میں ڈالا گیا‘ پھر رسول اللہ صلی اللہ علیہ وسلم نے فرمایا: کنویں والوں پر لعنت کی گئی ہے۔