(امام بخاری روایت کرتے ہیں کہ) ہمیں ابراہیم بن حمزہ نے حدیث بیان کی، انہوں نے کہا: ہمیں ابراہیم بن سعد نے حدیث بیان کی، از صالح از ابن شہاب از عبید اللہ بن عبد اللہ ان کو حضرت عبد اللہ بن عباس نے خبر دی، انہوں نے کہا: مجھے ابو سفیان نے خبر دی کہ ہرقل نے ان سے کہا:

میں نے تم سے سوال کیا تھا کہ لوگ زیادہ ہو رہے ہیں یا کم ہو رہے ہیں؟ تو تم نے کہا: وہ زیادہ ہو رہے ہیں، اسی طرح ایمان ہوتا ہے حتیٰ کہ وہ پورا ہو جائے، اور میں نے تم سے سوال کیا تھا کہ کیا کوئی شخص دین میں داخل ہونے کے بعد اس کو ناپسند کر کے اس سے پلٹ جاتا ہے؟ تو تم نے کہا: نہیں! اور اس طرح جب ایمان کی بشاشت دلوں میں رچ جاتی ہے تو کوئی اس کو ناپسند نہیں کرتا۔