(امام بخاری روایت کرتے ہیں کہ) ہمیں الحسن بن صباح نے حدیث بیان کی، انہوں نے جعفر بن عون سے سنا، انہوں نے کہا: ہمیں ابو العمیس نے حدیث بیان کی، انہوں نے کہا: ہمیں قیس بن مسلم نے خبر دی، از طارق بن شہاب از حضرت عمر بن الخطاب رضی اللہ عنہ

کہ یہود میں سے ایک شخص نے کہا: اے امیر المؤمنین! آپ کی کتاب میں ایک آیت ہے، جس کی آپ لوگ تلاوت کرتے ہیں، اگر وہ آیت ہم یہودیوں پر نازل ہوتی تو ہم اس دن کو عید مناتے، حضرت عمر نے پوچھا: وہ کون سی آیت ہے؟ تو اس نے کہا: ”آج میں نے تمہارے لیے تمہارے دین کو کامل کر دیا اور تم پر میں نے اپنی نعمت پوری کر دی اور تمہارے لیے اسلام کو بطور دین پسند کر لیا“ (المائدہ: ۳)۔ حضرت عمر نے کہا: ہمیں وہ دن بھی معلوم ہے اور مقام بھی معلوم ہے جہاں یہ آیت نبی صلی اللہ علیہ وسلم پر نازل ہوئی تھی، اس وقت آپ جمعہ کے دن میدانِ عرفات میں کھڑے ہوئے تھے۔