امام بخاری روایت کرتے ہیں: ہمیں علی بن عبداللہ نے حدیث بیان کی، انہوں نے کہا: ہمیں سفیان نے حدیث بیان کی، از یحییٰ از عمرہ از حضرت عائشہ رضی اللہ عنہا، انہوں نے بیان کیا کہ

ان کے پاس حضرت بریرہ رضی اللہ عنہا آئیں، اور ان سے یہ سوال کیا کہ وہ ان کا زر کتابت ادا کر دیں، حضرت عائشہ نے فرمایا: اگر تم چاہو تو میں تمہارے مالکوں کو تمہارا زر کتابت ادا کر دوں اور ولاء میرے لیے ہو گی، حضرت بریرہ کے مالکوں نے کہا: اگر آپ چاہیں تو باقی رقم ادا کر دیں، سفیان نے ایک بار کہا: اگر آپ چاہیں تو اس کو آزاد کر دیں اور ولاء ہمارے لیے ہو گی، پس جب رسول اللہ صلی اللہ علیہ وسلم آئے تو میں نے آپ سے اس کا ذکر کیا تو نبی صلی اللہ علیہ وسلم نے فرمایا: تم بریرہ کو خرید کر آزاد کر دو کیونکہ ولاء اس کے لیے ہوتی ہے جو آزاد کرتا ہے، پھر رسول اللہ صلی اللہ علیہ وسلم منبر پر کھڑے ہوئے، ایک بار سفیان نے کہا: رسول اللہ صلی اللہ علیہ وسلم منبر پر چڑھے اور فرمایا: ان لوگوں کا کیا حال ہے جو ایسی شرط عائد کرتے ہیں جو کتاب اللہ میں نہیں ہے، جس نے ایسی شرط لگائی جو کتاب اللہ میں نہیں ہے، وہ شرط اس کے لیے نہیں ہو گی خواہ وہ سو شرطیں لگائے۔

علی نے کہا، یحییٰ نے کہا اور عبدالوہاب نے از یحییٰ از عمرہ اور جعفر بن عون نے کہا از یحییٰ، انہوں نے کہا: میں نے عمرہ سے سنا، انہوں نے کہا: میں نے حضرت عائشہ رضی اللہ عنہا سے سنا۔ اس حدیث کو امام مالک نے روایت کیا ہے از یحییٰ از عمرہ کہ حضرت بریرہ، اور اس میں منبر پر چڑھنے کا ذکر نہیں کیا۔