امام بخاری روایت کرتے ہیں: ہمیں سعید بن عفیر نے حدیث بیان کی‘ انہوں نے کہا: مجھے لیث نے حدیث بیان کی‘ انہوں نے کہا: مجھے عقیل نے حدیث بیان کی از ابن شہاب‘ انہوں نے کہا: مجھے محمود بن الربیع الانصاری رضی اللہ عنہ نے خبر دی کہ حضرت عتبان بن مالک انصاری‘ رسول اللہ صلی اللہ علیہ وسلم کے اصحاب میں سے ہیں اور وہ ان انصار میں سے ہیں جو بدر میں حاضر ہوئے تھے‘ وہ رسول اللہ صلی اللہ علیہ وسلم کے پاس آئے اور انہوں نے کہا: یا رسول اللہ! میری بصارت بہت کمزور ہو گئی ہے اور میں اپنی قوم کو نماز پڑھاتا ہوں اور جب بارش ہوتی ہے تو میرے اور ان کے درمیان جو وادی ہے وہ بہنے لگتی ہے اور میں ان کی مسجد میں جانے کی اور انہیں نماز پڑھانے کی طاقت نہیں رکھتا‘ اور یا رسول اللہ! میں یہ چاہتا ہوں کہ آپ میرے ہاں تشریف لائیں اور میرے گھر میں نماز پڑھیں‘ پس میں اس جگہ کو مصلیٰ بنا لوں‘ انہوں نے بیان کیا: پس رسول اللہ صلی اللہ علیہ وسلم نے فرمایا: میں ان شاء اللہ عنقریب ایسا کروں گا۔ حضرت عتبان نے بیان کیا: پس دوسرے روز دن چڑھنے کے بعد رسول اللہ صلی اللہ علیہ وسلم اور حضرت ابوبکر رضی اللہ عنہ آ گئے‘ رسول اللہ صلی اللہ علیہ وسلم نے اجازت طلب کی تو میں نے آپ کو اجازت دی‘ گھر میں داخل ہونے کے بعد رسول اللہ صلی اللہ علیہ وسلم بیٹھے نہیں اور فرمایا: تم اپنے گھر میں کس جگہ پسند کرتے ہو جہاں میں نماز پڑھوں؟ انہوں نے کہا: میں نے گھر کی ایک جانب آپ کو اشارہ کیا‘ پس رسول اللہ صلی اللہ علیہ وسلم کھڑے ہو گئے اور آپ نے تکبیر پڑھی‘ پھر ہم بھی کھڑے ہو گئے اور ہم نے صف بنائی‘ آپ نے دو رکعت نماز پڑھائی‘ پھر سلام پھیر دیا‘ ہم نے آپ کو گوشت کا کھانا کھلانے کے لیے روک لیا جس کو ہم نے تیار کیا تھا‘ پھر گھر میں حویلی کے رہنے والے کافی لوگ آ گئے‘ وہ سب جمع تھے‘ ان میں سے کسی کہنے والے نے کہا: مالک بن دخیشن یا ابن الدخشن کہاں ہے؟ تو کسی نے کہا: وہ منافق ہے اللہ سے محبت کرتا ہے نہ اس کے رسول سے‘ تب رسول اللہ صلی اللہ علیہ وسلم نے فرمایا: ایسا نہ کہو کیا تم نہیں دیکھتے کہ اس نے اللہ کی رضا جوئی کے لیے لا الہ الا اللہ پڑھا ہے؟ اس شخص نے کہا: اللہ اور اس کے رسول کو زیادہ علم ہے‘ پس بے شک ہم اس کا ملنا جلنا اور اس کی خیر خواہی منافقوں کے ساتھ دیکھتے ہیں‘ رسول اللہ صلی اللہ علیہ وسلم نے فرمایا: پس بے شک اللہ نے اس شخص کو دوزخ کے اوپر حرام کر دیا ہے جس نے اللہ کی رضا جوئی کے لیے لا الہ الا اللہ پڑھا۔

ابن شہاب نے کہا: الحصین بن محمد الانصاری جو بنو سالم کے ایک فرد تھے اور ان کے سرداروں میں سے تھے‘ میں نے ان سے محمود بن الربیع کی حدیث کے متعلق سوال کیا تو انہوں نے اس کی تصدیق کی۔