امام بخاری روایت کرتے ہیں: ہمیں عبداللہ بن یوسف نے حدیث بیان کی، انہوں نے کہا: ہمیں مالک بن انس نے خبر دی از عبداللہ بن دینار از حضرت عبداللہ بن عمر رضی اللہ عنہما، وہ بیان کرتے ہیں کہ

جس وقت لوگ صبح کی نماز میں قباء میں تھے، ایک آنے والا آیا اور اس نے کہا: رسول اللہ صلی اللہ علیہ وسلم پر آج رات قرآن نازل ہوا ہے اور آپ کو یہ حکم دیا گیا ہے کہ آپ قبلہ کی طرف منہ کریں، پس تم بھی قبلہ کی طرف منہ کر لو، اس وقت نمازیوں کے چہرے شام کی طرف تھے، وہ فوراً کعبہ کی طرف پھر گئے۔