(امام بخاری نے کہا کہ) ہمیں یحییٰ بن بکیر نے حدیث بیان کی‘انہوں نے کہا کہ ہمیں لیث نے حدیث بیان کی از عقیل از ابن شہاب از عروہ بن زبیر از حضرت عائشہ ام المؤمنین رضی اللہ عنہا‘ وہ بیان کرتی ہیں کہ

رسول اللہﷺ پر سب سے پہلے وحی کی جو ابتداء کی گئی‘ وہ نیند میں (دکھائے ہوئے) سچے خواب تھے‘ آپ جو بھی خواب دیکھتے تھے‘ روشن صبح کی مثل اس کی تعبیر آ جاتی تھی‘ پھر آپ کی طرف تنہائی کی محبت ڈالی گئی‘ آپ غار حراء تنہائی میں جاتے اور گھر لوٹنے سے پہلے وہاں کئی کئی راتیں عبادت کرتے‘ آپ وہاں قیام کے لیے کھانے کی چیزیں لے جاتے تھے‘ پھر آپ حضرت خدیجہ کے پاس واپس آتے تو پھر آپ اسی طرح کھانے کی چیزیں لے لیتے‘ حتیٰ کہ آپ کے پاس وحی آ گئی‘ اس وقت آپ غار حراء میں تھے‘ آپ کے پاس فرشتہ آیا‘ اس نے کہا: ”پڑھیے“۔ آپ نے فرمایا: ”میں پڑھنے والا نہیں ہوں“ آپ فرماتے ہیں: پس اس نے مجھے پکڑا اور اتنے زور سے بھینچا کہ مجھے انتہائی مشقت ہوئی‘ پھر اس نے مجھے چھوڑ دیا‘ اس نے پھر کہا: ”پڑھیے“۔ میں نے کہا: ”میں پڑھنے والا نہیں ہوں“۔ اس نے پھر دوسری بار مجھے پکڑا اور اتنے زور سے بھینچا کہ مجھے انتہائی مشقت ہوئی‘ پھر اس نے مجھے چھوڑ دیا اور کہا: ”پڑھیے“۔ میں نے کہا: ”میں پڑھنے والا نہیں ہوں“ پس اس نے مجھے پکڑا اور تیسری بار اتنے زور سے مجھے بھینچا کہ مجھے انتہائی مشقت ہوئی‘ پھر اس نے مجھے چھوڑ دیا‘ پھر کہا: ”(اے رسول مکرم!) اپنے رب کے نام سے پڑھیے جس نے (آپ کو) پیدا کیا O جمے ہوئے خون سےانسان کو پیدا کیا O پڑھیے اور آپ کا رب سب سے زیادہ کریم ہے “ (العلق: ۱-۳) رسول اللہﷺ نے ان آیات کو پڑھا‘ پھر اس حال میں گھر لوٹے کہ آپ کا دل کپکپا رہا تھا‘ آپ حضرت خدیجہ بنت خویلد رضی اللہ عنہا کے پاس آئے اور فرمایا: ”مجھے چادر اڑھاؤ‘ مجھے چادر اڑھاؤ“۔ سو گھر والوں نے آپ کو چادر اڑھائی‘ حتیٰ کہ جب آپ کا خوف دور ہو گیا تو آپ نے حضرت خدیجہ کو اس واقعہ کی خبر دی اور فرمایا: مجھے اپنے نفس پر خطرہ ہے۔ حضرت خدیجہ نے کہا: ہرگز نہیں! اللہ کی قسم! اللہ آپ کو کبھی شرمندہ نہیں کرے گا‘ آپ رشتہ داروں سے میل جول رکھتے ہیں‘ کم زوروں کا بوجھ اٹھاتے ہیں‘ ناداروں کے لیے کماتے ہیں‘ مہمان نوازی کرتے ہیں اور راہِ حق میں پیش آنے والی مشکلات میں مدد کرتے ہیں‘ پھر حضرت خدیجہ آپ کو لے گئیں‘ حتیٰ کہ ورقہ بن نوفل بن اسد بن عبدالعزی کے پاس پہنچیں جو حضرت خدیجہ کے عم زاد تھے۔ وہ زمانہ جاہلیت میں نصرانی ہو گئے تھے‘ وہ عبرانی زبان میں کتاب لکھتے تھے‘ چنانچہ وہ انجیل کو جتنا اللہ چاہتا عبرانی زبان میں لکھتے تھے‘ وہ بہت بوڑھے تھے اور نابینا ہو گئے تھے‘ حضرت خدیجہ نے ان سے کہا: اے میرے عم زاد! اپنے بھتیجے کی بات سنیے‘ پس آپ سے ورقہ نے کہا: اے بھتیجے! آپ کیا دیکھتے ہیں؟ تب رسول اللہ ﷺنے ان کو بتایا جو کچھ آپ نے دیکھا تھا‘ پھر آپ سے ورقہ نے کہا: یہ وہی ناموس (پیغام رساں فرشتہ) ہے جس کو اللہ نے حضرت موسیٰ پر نازل کیا تھا‘ کاش میں اس وقت جوان ہوتا! کاش میں اس وقت زندہ ہوتا! جب آپ کی قوم آپ کو نکال دے گی‘ تب رسول اللہ ﷺنے فرمایا: کیا وہ مجھ کو نکالنے والے ہیں؟ ورقہ نے کہا: ہاں! جو شخص بھی آپ جیسا پیغام لے کر آیا اس سے عداوت رکھی گئی‘ اگر مجھ کو اس زمانہ نے پایا تو میں آپ کی بہت قوی مدد کروں گا‘ اس کے بعد ورقہ زیادہ دن زندہ نہ رہے اور ان کی وفات ہو گئی اور وحی کا نازل ہونا رک گیا۔