امام بخاری روایت کرتے ہیں: ہمیں اسماعیل بن ابی اویس نے حدیث بیان کی‘ انہوں نے کہا: مجھے امام مالک بن انس نے حدیث بیان کی از ابی النضر مولیٰ عمر بن عبیداللہ کہ ابومرہ مولیٰ ام ہانی بنت ابی طالب نے ان کو خبر دی کہ انہوں نے حضرت ام ہانی‘ بنت ابی طالب سے سنا کہ

میں فتح مکہ کے سال رسول اللہ صلی اللہ علیہ وسلم کے پاس گئی‘ اس وقت آپ غسل کر رہے تھے اور آپ کی صاحب زادی سیدہ فاطمہ رضی اللہ عنہا آپ پر پردہ کر رہی تھیں‘ وہ بیان کرتی ہیں کہ میں نے آپ کو سلام کیا‘ آپ نے فرمایا: یہ کون ہے؟ میں نے کہا: میں ام ہانی بنت ابی طالب ہوں‘ آپ نے فرمایا: خوش آمدید! ام ہانی‘ جب آپ غسل سے فارغ ہو گئے تو آپ نے ایک کپڑا اپنے گرد لپیٹ کر آٹھ رکعات نماز پڑھی‘ جب آپ نماز سے فارغ ہو گئے تو میں نے عرض کیا: یا رسول اللہ! میری ماں کا بیٹا یہ کہتا ہے کہ وہ اس شخص کو قتل کرے گا جس کو میں پناہ دے چکی ہوں وہ فلاں بن ھبیرہ ہے‘ تب رسول اللہ صلی اللہ علیہ وسلم نے فرمایا: اے ام ہانی‘ جس کو تم نے پناہ دی ہے‘ اس کو ہم نے پناہ دی‘ حضرت ام ہانی‘ نے کہا: وہ چاشت کا وقت تھا۔