(امام بخاری روایت کرتے ہیں کہ) ہمیں قبیصہ بن عقبہ نے حدیث بیان کی، انہوں نے کہا: ہمیں سفیان نے حدیث بیان کی از اعمش از عبداللہ بن مرہ از مسروق از عبداللہ بن عمرو کہ نبی صلی اللہ علیہ وسلم نے فرمایا:

چار خصلتیں جس میں ہوں گی، وہ خالص منافق ہو گا اور جس میں ان چار میں سے ایک خصلت ہو اس میں نفاق کی ایک خصلت ہو گی، حتیٰ کہ وہ اس خصلت کو چھوڑ دے: (۱) جب اس کے پاس امانت رکھی جائے تو اس میں خیانت کرے (۲) اور جب بات کرے تو جھوٹ بولے (۳) اور جب عہد کرے تو توڑ دے (۴) اور جب جھگڑا کرے تو بدکلامی کرے اور حد سے تجاوز کرے۔

اس حدیث کی شعبہ نے از الاعمش متابعت کی ہے۔