امام بخاری روایت کرتے ہیں: ہمیں احمد بن یونس نے حدیث بیان کی، انہوں نے کہا: ہمیں زہیر نے حدیث بیان کی، انہوں نے کہا: ہمیں حمید نے حدیث بیان کی از حضرت انس رضی اللہ عنہ، انہوں نے بیان کیا کہ

حضرت عبدالرحمن بن عوف رضی اللہ عنہ مدینہ میں آئے تو نبی صلی اللہ علیہ وسلم نے ان کو اور حضرت سعد بن ربیع رضی اللہ عنہ کو آپس میں بھائی بنا دیا اور حضرت سعد مال دار تھے، پس انہوں نے حضرت عبدالرحمن سے کہا: میں اپنا مال تم میں نصف نصف تقسیم کر دیتا ہوں اور (اپنی بیوی سے) تمہاری شادی بھی کر دیتا ہوں، حضرت عبدالرحمن نے کہا: اللہ تعالیٰ آپ کے اہل اور مال میں برکت دے، آپ لوگ مجھے بازار دکھائیں، پھر حضرت عبدالرحمن (بازار سے) اس وقت واپس آئے جب وہ زائد پنیر اور گھی بھی لے آئے تھے، پس وہ ان چیزوں کو لے کر اپنے گھر والوں کے پاس آئے، پھر ہم چند دن ٹھہرے تھے یا جتنے دن اللہ تعالیٰ نے چاہا تھا کہ ایک دن حضرت عبدالرحمن آئے اور ان پر زرد رنگ کے نشان تھے تو ان سے نبی صلی اللہ علیہ وسلم نے پوچھا: یہ کیسا رنگ ہے؟ تو انہوں نے کہا: یا رسول اللہ! میں نے انصار کی ایک عورت سے شادی کر لی ہے، آپ نے پوچھا: تم نے ان کو مہر کتنا دیا ہے؟ تو انہوں نے کہا: سونے کی ایک گٹھلی یا کہا: گٹھلی کے برابر سونا، آپ نے فرمایا: تم ولیمہ کرو خواہ ایک بکری سے۔