امام بخاری روایت کرتے ہیں: ہمیں عمرو بن علی نے حدیث بیان کی‘ انہوں نے کہا: ہمیں ابو عاصم نے خبر دی از ابن جریج‘ انہوں نے بیان کیا کہ میں نے عطاء سے سنا کہ ابو العباس شاعر نے ان کو خبر دی کہ انہوں نے حضرت عبد اللہ بن عمرو رضی اللہ عنہما سے سنا‘ وہ بیان کرتے ہیں کہ

نبی صلی اللہ علیہ وسلم کو یہ خبر پہنچی کہ میں مسلسل روزے رکھتا ہوں اور رات کو نوافل پڑھتا ہوں‘ پس یا تو رسول اللہ صلی اللہ علیہ وسلم نے مجھے پیغام بھیجا یا میں ازخود آپ سے ملا‘ پس آپ نے فرمایا: کیا مجھے یہ خبر نہیں پہنچی کہ تم روزے رکھتے ہو اور روزے چھوڑتے نہیں ہو اور نماز پڑھتے ہو اور سوتے نہیں ہو‘ پس تم روزہ رکھا کرو اور روزہ چھوڑا بھی کرو‘ اور رات کو قیام کرو اور سویا بھی کرو‘ کیونکہ تمہاری آنکھوں کا تم پر حق ہے اور تمہارے بدن کا بھی تم پر حق ہے‘ اور تمہارے اہل کا بھی تم پر حق ہے، انہوں نے کہا: میں اس کی طاقت رکھتا ہوں‘ آپ نے فرمایا: پھر تم حضرت داؤد علیہ السلام کے روزے رکھو‘ انہوں نے پوچھا: وہ کیسے ہیں؟ آپ نے فرمایا: وہ ایک دن روزہ رکھتے تھے اور ایک دن افطار کرتے تھے اور جب دشمن سے مقابلہ ہوتا تو فرار نہیں ہوتے تھے، اس پر حضرت عبداللہ نے کہا: حضرت داؤد علیہ السلام کی اس خصلت کا ( کہ میں میدانِ جنگ سے فرار اختیار نہ کروں ) کون ضامن ہوگا! عطاء نے کہا: میں نہیں جانتا کہ آپ نے کس طرح دائمی روزوں کا ذکر کیا‘ نبی صلی اللہ علیہ وسلم نے دو بار فرمایا: جس نے دائمی روزے رکھے‘ اس نے روزہ نہیں رکھا۔