امام بخاری روایت کرتے ہیں: ہمیں ابو الیمان نے حدیث بیان کی‘ انہوں نے کہا: ہمیں شعیب نے خبر دی از الزہری‘ انہوں نے کہا: مجھے سعید بن المسیب نے اور ابو سلمہ بن عبدالرحمٰن نے خبر دی کہ حضرت عبداللہ بن عمرو رضی اللہ عنہ نے کہا کہ

رسول اللہ صلی اللہ علیہ وسلم کو یہ خبر دی گئی کہ میں یہ کہتا ہوں کہ اللہ کی قسم! جب تک میں زندہ رہوں گا میں ضرور دن میں روزہ رکھوں گا اور ضرور رات میں قیام کروں گا‘پس میں نے آپ سے کہا: آپ پر میرے باپ اور میری ماں فدا ہوں! میں نے اس طرح کہا ہے‘ آپ نے فرمایا: پس بے شک تم اس کی طاقت نہیں رکھتے‘ پس تم روزہ (بھی) رکھو اور روزہ چھوڑو (بھی) اور قیام (بھی) کرو اور سوؤ (بھی) اور ہر مہینے کے تین دنوں میں روزہ رکھو کیونکہ ایک نیکی کا دس گنا اجر ہوتا ہے اور یہ تاحیات روزے رکھنے کی مثل ہے‘ میں نے کہا: بے شک میں اس سے زیادہ کی طاقت رکھتا ہوں‘ آپ نے فرمایا: پھر ایک دن روزہ رکھو اور دو دن روزہ چھوڑو‘ میں نے کہا: میں اس سے زیادہ کی طاقت رکھتا ہوں‘ آپ نے فرمایا: پھر تم ایک دن روزہ رکھو اور ایک دن روزہ چھوڑو اور یہ حضرت داؤد علیہ السلام کے روزے ہیں اور یہ سب سے افضل روزے ہیں‘ پس میں نے کہا: میں اس سے افضل کی طاقت رکھتا ہوں تو نبی صلی اللہ علیہ وسلم نے فرمایا: اس سے افضل کوئی چیز نہیں۔