امام بخاری روایت کرتے ہیں: ہمیں اسحاق الواسطی نے حدیث بیان کی‘ انہوں نے کہا: ہمیں خالد نے حدیث بیان کی از شیبانی از حضرت عبداللہ بن ابی اوفیٰ رضی اللہ عنہما‘ وہ بیان کرتے ہیں کہ

ہم رسول اللہ صلی اللہ علیہ وسلم کے ساتھ ایک سفر میں تھے اور آپ روزہ دار تھے‘ پس جب سورج غروب ہو گیا تو آپ نے کسی سے فرمایا: اے فلاں! اٹھو اور ہمارے لیے ستو گھولو! اس نے کہا: یا رسول اللہ! اگر آپ شام کر لیتے تو؟ آپ نے فرمایا: تم سواری سے اترو اور ہمارے لیے ستو گھولو! اس نے کہا: یا رسول اللہ! اگر آپ شام کر لیتے تو؟ آپ نے فرمایا: تم سواری سے اترو اور ہمارے لیے ستو گھولو! اس نے کہا: ابھی آپ کے اوپر دن ہے‘ آپ نے فرمایا: اترو اور ہمارے لیے ستو گھولو‘ پس وہ اترا اور اس نے ان کے لیے ستو گھولے‘ پس نبی صلی اللہ علیہ وسلم نے ستو پیئے‘ پھر آپ نے فرمایا: جب تم رات کو اس طرف (مشرق) سے آتے ہوئے دیکھو تو اس وقت روزہ دار کا روزہ افطار ہو جاتا ہے۔