امام بخاری روایت کرتے ہیں: ہمیں موسیٰ بن اسماعیل نے حدیث بیان کی انہوں نے کہا: ہمیں ابو عوانہ نے حدیث بیان کی از منصور از مجاہد از طاؤس از حضرت ابن عباس رضی اللہ عنہما، وہ بیان کرتے ہیں کہ

رسول اللہ ﷺ مدینہ سے مکہ کی طرف نکلے پس آپ نے روزہ رکھا حتیٰ کہ آپ مقام عسفان پر پہنچے پھر آپ نے پانی منگایا پھر اس کو اپنے ہاتھوں پر رکھ کر اس قدر اونچا کیا کہ لوگ دیکھ لیں، پس آپ نے روزہ کھول لیا، حتیٰ کہ آپ مکہ میں پہنچ گئے اور یہ رمضان کا واقعہ ہے، لہٰذا حضرت ابن عباس رضی اللہ عنہما یہ کہتے تھے کہ رسول اللہ ﷺ نے سفر میں روزہ رکھا بھی ہے اور روزہ چھوڑا بھی ہے، پس جو چاہے روزہ رکھے اور جو چاہے روزہ افطار کرے۔