امام بخاری روایت کرتے ہیں: ہمیں ابراہیم بن المنذر نے حدیث بیان کی، انہوں نے کہا: مجھے معن نے حدیث بیان کی، انہوں نے کہا: مجھے امام مالک نے حدیث بیان کی از ابن شہاب از حمید بن عبدالرحمن از حضرت ابوہریرہ رضی اللہ عنہ کہ رسول اللہ صلی اللہ علیہ وسلم نے فرمایا:

جو شخص اللہ کی راہ میں ایک جوڑا خرچ کرے گا، اس کو جنت کے دروازوں سے پکارا جائے گا: اے اللہ کے بندے! یہ خیر ہے، پس جو شخص نمازیوں میں سے ہو گا، اس کو باب الصلوۃ سے بلایا جائے گا اور جو شخص مجاہدوں میں سے ہو گا اس کو باب الجہاد سے بلایا جائے گا اور جو شخص روزہ داروں میں سے ہو گا، اس کو باب الریان سے بلایا جائے گا اور جو شخص اہل صدقہ میں سے ہو گا، اس کو باب الصدقہ سے بلایا جائے گا، تب حضرت ابوبکر رضی اللہ عنہ نے کہا: یا رسول اللہ! آپ پر میرے باپ اور ماں فدا ہوں! اگر کسی کو ان دروازوں میں سے کسی ایک دروازہ سے بلایا جائے تو وہ بھی بہت اچھا ہے لیکن کیا کوئی ایسا بھی ہو گا جس کو ان تمام دروازوں سے بلایا جائے؟ آپ نے فرمایا: ہاں! اور مجھے امید ہے کہ ایسے تم ہو گے۔