امام بخاری روایت کرتے ہیں: ہمیں عبداللہ بن یوسف نے حدیث بیان کی‘ انہوں نے کہا: ہمیں امام مالک نے خبر دی از زید بن اسلم از ابراہیم بن عبداللہ بن حنین از والد خود‘ وہ بیان کرتے ہیں

کہ حضرت عبداللہ بن عباس اور حضرت مسور بن مخرمہ کا مقام ابواء میں اختلاف ہوا‘ حضرت عبداللہ بن عباس رضی اللہ عنہما نے کہا: محرم اپنا سر دھو سکتا ہے اور حضرت مسور نے کہا: محرم اپنا سر نہیں دھو سکتا‘ پس مجھے حضرت عبداللہ بن عباس نے حضرت ایوب انصاری رضی اللہ عنہم کی طرف بھیجا تو میں نے دیکھا کہ وہ کنویں کی دو لکڑیوں کے درمیان نہا رہے ہیں‘ اور انہوں نے ایک کپڑے سے پردہ کیا ہوا ہے‘ میں نے ان کو سلام کیا‘ انہوں نے پوچھا: یہ کون ہے؟ میں نے کہا: میں عبداللہ بن حنین ہوں‘ مجھے آپ کے پاس حضرت عبداللہ بن عباس نے بھیجا ہے‘ میں آپ سے یہ پوچھتا ہوں کہ رسول اللہ ﷺ جب محرم ہوتے تھے تو اپنا سر کس طرح دھوتے تھے؟ تو حضرت ایوب نے اپنا ہاتھ پردہ پر رکھا‘ پھر اس کو اتنا نیچا کیا حتیٰ کہ مجھے ان کا سر دکھائی دیا‘ پھر ایک شخص سے کہا جو ان پر پانی ڈال رہا تھا کہ پانی ڈالو‘ پس اس نے ان کے سر پر پانی ڈالا‘ پھر دونوں ہاتھوں سے انہوں نے سر کو ہلایا‘ سر کو آگے لے گئے اور پیچھے لائے اور کہا: میں نے اس طرح رسول اللہ ﷺ کو کرتے ہوئے دیکھا ہے۔