مُحرم شکار کو قتل کرنے میں غیر محرم کی مدد نہ کرے امام بخاری روایت کرتے ہیں: ہمیں عبداللہ بن محمد نے حدیث بیان کی‘ انہوں نے کہا: ہمیں سفیان نے حدیث بیان کی‘ انہوں نے کہا: ہمیں صالح بن کیسان نے حدیث بیان کی از ابومحمد نافع جو حضرت ابوقتادہ کے آزاد کردہ غلام تھے‘ وہ بیان کرتے ہیں کہ انہوں نے حضرت ابوقتادہ رضی اللہ عنہ سے سنا‘ انہوں نے کہا کہ ہم نبی صلی اللہ علیہ وسلم کے ساتھ مقام القاحہ میں تھے جو مدینہ سے تین منزل کے فاصلہ پر ہے‘ (ح) اور ہمیں علی بن عبد اللہ نے حدیث بیان کی‘ انہوں نے کہا: ہمیں سفیان نے حدیث بیان کی‘ انہوں نے کہا: ہمیں صالح بن کیسان نے حدیث بیان کی از ابومحمد از حضرت ابوقتادہ رضی اللہ عنہ‘ انہوں نے بیان کیا کہ

ہم نبی صلی اللہ علیہ وسلم کے ساتھ مقام القاحۃ میں تھے اور ہم میں سے بعض محرم تھے اور بعض غیر محرم تھے‘ پھر میں نے دیکھا کہ میرے اصحاب ایک دوسرے کو کوئی چیز دکھا رہے ہیں‘ پھر میں نے غور کیا تو وہ ایک جنگلی گدھا تھا (پھر میں گھوڑے پر سوار ہوا اور میں نے نیزہ اور چابک ساتھ لیا) میرا چابک گر گیا‘ پس میرے اصحاب نے کہا: ہم تمہاری کوئی مدد نہیں کریں گے کیونکہ ہم محرم ہیں‘ میں نے خود وہ چابک اٹھا لیا‘ پھر میں نے ٹیلے کے پیچھے سے اس جنگلی گدھے پر حملہ کیا اور اس کو زخمی کر کے اپنے اصحاب کے پاس لے آیا‘ پھر ان میں سے بعض نے کہا: اس کو کھاؤ اور بعض نے کہا: نہ کھاؤ‘ پھر میں نبی صلی اللہ علیہ وسلم کے پاس گیا اور آپ ہم سے آگے نکل چکے تھے‘ میں نے آپ سے اس کو کھانے کے متعلق استفسار کیا‘ تو آپ نے فرمایا: اس کو کھالو‘ وہ حلال ہے۔ سفیان نے کہا: ہم سے عمرو بن دینار نے کہا: صالح بن کیسان کے پاس جاؤ‘ ان سے اس حدیث کے متعلق اور دیگر احادیث کے متعلق سوال کرو‘ وہ یہاں ہمارے پاس آئے تھے۔