امام بخاری روایت کرتے ہیں: ہمیں علی بن عبداللہ نے حدیث بیان کی‘ انہوں نے کہا: ہمیں سفیان نے حدیث بیان کی‘ انہوں نے کہا: ہمیں عبدالرحمن بن القاسم نے حدیث بیان کی اور وہ اپنے زمانہ میں سب سے افضل تھے‘ انہوں نے اپنے والد سے سنا اور وہ اپنے زمانہ میں سب سے افضل تھے‘ انہوں نے کہا: میں نے حضرت عائشہ رضی اللہ عنہا سے سنا‘ وہ بیان کرتی ہیں کہ

جب رسول اللہ صلی اللہ علیہ وسلم نے احرام باندھا تو میں نے اپنے ان دونوں ہاتھوں سے رسول اللہ صلی اللہ علیہ وسلم کو خوشبو لگائی اور جب آپ نے احرام کھولا تو آپ کے طواف زیارت کرنے سے پہلے میں نے آپ کو خوشبو لگائی اور حضرت عائشہ نے اپنے دونوں ہاتھ پھیلائے۔