امام بخاری روایت کرتے ہیں: ہمیں مسدد نے حدیث بیان کی از عبدالواحد‘ انہوں نے کہا: ہمیں الاعمش نے حدیث بیان کی‘ انہوں نے کہا:

میں نے حجاج کو منبر پر یہ کہتے ہوئے سنا ہے کہ وہ سورت جس میں البقرہ کا ذکر ہے اور وہ سورت جس میں آل عمران کا ذکر ہے اور وہ سورت جس میں النساء کا ذکر ہے‘ الاعمش نے کہا: پھر میں نے اس بات کا ذکر ابراہیم سے کیا تو انہوں نے کہا: مجھے عبدالرحمان بن یزید نے حدیث بیان کی کہ وہ اس وقت حضرت عبداللہ بن مسعود رضی اللہ عنہ کے ساتھ تھے‘ جب انہوں نے جمرۃ العقبہ پر کنکریاں ماریں‘ پس وادی کو نشیب میں رکھا‘ جب درخت کے برابر پہنچے تو اس وادی کے عرض میں آگئے‘ پھر سات کنکریاں ماریں اور ہر کنکری کے ساتھ اللہ اکبر پڑھتے‘ پھر کہا: اس ذات کی قسم جس کے سوا کوئی عبادت کا مستحق نہیں ہے! اسی جگہ وہ کھڑے ہوئے تھے جن کے اوپر سورۃ البقرہ نازل ہوئی تھی، صلی اللہ علیہ وسلم ۔