امام بخاری روایت کرتے ہیں: ہمیں علی بن عبداللہ نے حدیث بیان کی‘ انہوں نے کہا: مجھے یحییٰ بن سعید نے حدیث بیان کی‘ انہوں نے کہا: ہمیں فضیل بن غزوان نے حدیث بیان کی‘ انہوں نے کہا: ہمیں عکرمہ نے حدیث بیان کی از حضرت ابن عباس رضی اللہ عنہما‘ وہ بیان کرتے ہیں

کہ رسول اللہ صلی اللہ علیہ وسلم نے قربانی کے دن لوگوں کو خطبہ دیا‘ پس آپ نے فرمایا: اے لوگو! یہ کون سا دن ہے؟ مسلمانوں نے کہا: یہ حرمت والا دن ہے‘ آپ نے فرمایا: یہ کون سا شہر ہے؟ مسلمانوں نے کہا: یہ حرمت والا شہر ہے‘ آپ نے فرمایا: یہ کون سا مہینہ ہے؟ مسلمانوں نے کہا: یہ حرمت والا مہینہ ہے‘ آپ نے فرمایا: پس بے شک تمہارے خون اور تمہارے مال اور تمہاری عزتیں تم پر اس طرح حرام ہیں‘ جس طرح تمہارے اس دن کی‘ تمہارے اس شہر کی‘ تمہارے اس مہینہ کی حرمت ہے‘ آپ نے اس بات کو متعدد بار دہرایا‘ پھر آپ نے اپنا سر اٹھا کر کہا: اے اللہ! کیا میں نے تبلیغ کر دی ہے؟ اے اللہ! کیا میں نے تبلیغ کر دی ہے؟ حضرت ابن عباس رضی اللہ عنہما نے کہا: پس اس ذات کی قسم جس کے قبضہ و قدرت میں میری جان ہے! بے شک یہ آپ کی اپنی امت کی طرف وصیت ہے‘ (پھر آپ نے فرمایا:) پس چاہیے کہ حاضر‘ غائب تک یہ بات پہنچا دے‘ تم میرے بعد کفار نہ ہو جانا کہ تم ایک دوسرے کی گردنیں مارو۔