امام بخاری روایت کرتے ہیں: ہمیں یحییٰ بن بکیر نے حدیث بیان کی، انہوں نے کہا: ہمیں لیث نے حدیث بیان کی از عقیل از ابن شہاب از سالم بن عبداللہ وہ کہتے ہیں کہ حضرت عبداللہ بن عمر رضی اللہ عنہما نے بیان کیا کہ رسول اللہ صلی اللہ علیہ وآلہ وسلم نے حجۃ الوداع میں تمتع کیا (یعنی) عمرہ کو حج کے ساتھ ملایا اور ھدی ساتھ لی‘ آپ ذوالحلیفہ سے اپنے ساتھ ہدی کو لے گئے اور رسول اللہ صلی اللہ علیہ وآلہ وسلم نے ابتداء کی‘ پس آپ نے عمرہ کا احرام باندھا‘ پھر حج کا احرام باندھا‘ لوگوں نے بھی آپ کے ساتھ تمتع کیا (عمرہ کر کے حج کا احرام باندھا)‘ پس لوگوں میں بعض وہ تھے جو ہدی (قربانی) لے کر چلے تھے‘ سو انہوں نے ہدی روانہ کی اور بعض ان میں سے وہ تھے جو ہدی لے کر نہیں چلے تھے‘ پس جب نبی صلی اللہ علیہ وآلہ وسلم مکہ پہنچے تو آپ نے لوگوں سے فرمایا: تم میں سے جس نے ہدی روانہ کی ہے اس پر جو چیزیں حرام تھیں‘ وہ اس پر اس وقت تک حلال نہیں ہوں گی حتیٰ کہ وہ حج ادا کر لے‘ اور تم میں سے جس نے ہدی روانہ نہیں کی ہے وہ بیت اللہ کا اور صفا اور المروۃ کا طواف کرے اور اپنے بال کاٹے اور احرام کھول دے‘ پھر وہ حج کا احرام باندھے‘ پھر اگر اس کو قربانی نہ ملے تو وہ ایامِ حج میں تین دن کے روزے رکھے اور اپنے گھر لوٹنے کے بعد سات روزے رکھے‘ پس جب آپ مکہ میں آئے تو آپ نے طواف کیا اور سب سے پہلے حجر اسود کی تعظیم کی‘ پھر تین چکر دوڑ کر کیے اور چار چکر پیدل چل کر کیے‘ پس جب آپ نے طواف مکمل کر لیا تو مقام ابراہیم کے پاس دو رکعت نماز پڑھی‘ پھر سلام پھیرا‘ اور مڑ کر صفا پر آئے‘ پھر صفا اور المروۃ میں سات طواف کیے‘ پھر جو چیزیں آپ پر حرام تھیں وہ بدستور حرام رہیں حتیٰ کہ آپ نے حج مکمل کر لیا اور یوم النحر کو اپنی ہدی کو نحر کر لیا‘ پھر آپ لوٹ کر مکہ آئے اور بیت اللہ کا طواف (زیارت) کیا‘ پھر جو تمام چیزیں آپ پر حرام تھیں‘ وہ سب حلال ہوگئیں اور لوگوں میں سے جو شخص اپنے ساتھ ہدی لایا تھا اور اس نے ہدی روانہ کی تھی‘ اس نے بھی اسی طرح کیا جس طرح رسول اللہ صلی اللہ علیہ وآلہ وسلم نے کیا تھا۔