امام بخاری روایت کرتے ہیں: ہمیں عبداللہ بن رجاء نے حدیث بیان کی، انہوں نے کہا: ہمیں اسرائیل نے حدیث بیان کی از ابی اسحاق از عبدالرحمن بن یزید، انہوں نے بیان کیا کہ

ہم حضرت عبداللہ بن مسعود کے ساتھ مکہ کی طرف گئے، پھر ہم المزدلفہ میں آئے تو حضرت عبداللہ بن مسعود نے دو نمازیں (مغرب اور عشاء) پڑھائیں، ہر نماز الگ اذان اور اقامت کے ساتھ پڑھائی، اور ان کے درمیان عشاء کی نماز پڑھائی، پھر جب فجر طلوع ہوگئی تو فجر کی نماز پڑھائی، اس وقت کوئی کہنے والا کہہ رہا تھا کہ فجر طلوع ہوگئی اور کوئی دوسرا کہنے والا کہہ رہا تھا کہ فجر طلوع نہیں ہوئی، پھر حضرت ابن مسعود نے کہا کہ بے شک رسول اللہ صلی اللہ علیہ وآلہ وسلم نے فرمایا: یہ دو نمازیں اس جگہ میں اپنے مقررہ وقتوں سے ہٹا دی گئی ہیں: مغرب اور عشاء، پس لوگ المزدلفہ میں اس وقت تک داخل نہ ہوں حتیٰ کہ اندھیرا پھیل جائے اور فجر کی نماز اس وقت میں پڑھیں، پھر وہ کھڑے رہے حتیٰ کہ روشنی ہوگئی، پھر انہوں نے کہا: اگر امیر المؤمنین (حضرت عثمان) اس وقت المزدلفہ سے لوٹیں تو ان کا یہ عمل سنت کے مطابق ہوگا، عبدالرحمن بن یزید نے کہا: پھر مجھے معلوم نہیں کہ حضرت ابن مسعود نے یہ بات جلدی کہی تھی یا حضرت عثمان رضی اللہ عنہ کا المزدلفہ سے لوٹنا، پھر حضرت عبداللہ مسلسل ”اللہم لبیک“ کہتے رہے حتیٰ کہ انہوں نے یوم النحر (قربانی کے دن) جمرہ عقبہ پر کنکریاں ماریں۔