امام بخاری روایت کرتے ہیں: ہمیں مومل بن ہشام نے حدیث بیان کی، انہوں نے کہا: ہمیں اسماعیل نے حدیث بیان کی از ایوب از حفصہ، انہوں نے بیان کیا:

ہم کنواری عورتوں کو باہر نکلنے سے منع کرتے تھے، پھر ایک عورت آئی اور (بصرہ میں) بنو خلف کے محل میں اتری، اس نے یہ حدیث بیان کی کہ اس کی بہن رسول اللہ صلی اللہ علیہ وآلہ وسلم کے ایک صحابی کے نکاح میں تھی جس نے رسول اللہ صلی اللہ علیہ وآلہ وسلم کے ساتھ بارہ جہاد کیے تھے اور میری بہن بھی چھ غزوات میں اس کے ساتھ تھی، اس نے کہا: ہم زخمیوں کی دوادارو کرتے تھے اور بیماروں کی تیمارداری کرتے تھے، پس میری بہن نے رسول اللہ صلی اللہ علیہ وآلہ وسلم سے سوال کیا: کیا ہم میں سے کسی پر کوئی حرج ہے کہ اگر اس کے پاس چادر نہ ہو تو وہ جہاد میں نہ جائے؟ آپ نے فرمایا: اس کو چاہیے کہ وہ اپنی سہیلی کی چادر اوڑھ لے اور اس کو چاہیے کہ وہ نیک کام میں اور مسلمانوں کی دعا میں شریک ہو، پس جب حضرت ام عطیہ رضی اللہ عنہا آئیں تو ہم نے ان سے اس حدیث کے متعلق سوال کیا اور ان کی عادت تھی کہ وہ جب بھی رسول اللہ صلی اللہ علیہ وآلہ وسلم کا ذکر کرتیں تو کہتیں: آپ پر میرا باپ فدا ہو، ہم نے کہا: کیا آپ نے رسول اللہ صلی اللہ علیہ وآلہ وسلم کو اس طرح اور اس طرح فرماتے ہوئے سنا ہے؟ انہوں نے کہا: ہاں! آپ پر میرا باپ فدا ہو! آپ نے فرمایا: کنواری، پردہ دار اور حیض والیاں سب نکلیں اور نیک کاموں میں اور مسلمانوں کی دعا میں حاضر ہوں اور حیض والیاں نماز کی جگہوں سے الگ رہیں، میں نے کہا: حیض والی بھی؟ انہوں نے کہا: کیا حیض والی عورت میدانِ عرفات میں اور فلاں فلاں جگہ (یعنی مزدلفہ اور منیٰ میں) نہیں جاتی۔