اور عبدان نے کہا: ہمیں عبداللہ نے خبر دی، انہوں نے کہا: ہمیں یونس نے خبر دی از الزہری، حضرت انس بن مالک رضی اللہ عنہ نے کہا کہ حضرت ابوذر رضی اللہ عنہ یہ حدیث بیان کرتے تھے کہ رسول اللہ صلی اللہ علیہ وسلم نے فرمایا:

میرے گھر کی چھت میں شگاف کیا گیا اور میں اس وقت مکہ میں تھا، پس حضرت جبریل علیہ السلام نازل ہوئے، پھر انہوں نے میرے سینہ میں شگاف کیا، پھر اس کو زمزم کے پانی سے دھویا، پھر وہ سونے کا ایک طشت لے کر آئے جو حکمت اور ایمان سے بھرا ہوا تھا، انہوں نے اس کو میرے سینے میں انڈیل دیا، پھر اس کو منطبق کر دیا، پھر انہوں نے میرا ہاتھ پکڑا اور مجھے آسمانِ دنیا کی طرف چڑھایا، حضرت جبریل نے آسمانِ دنیا کے محافظ سے کہا: کھولو! اس نے پوچھا: یہ کون ہیں؟ انہوں نے کہا: جبریل!