امام بخاری روایت کرتے ہیں: ہمیں اسحاق نے حدیث بیان کی، انہوں نے کہا: ہمیں خالد نے حدیث بیان کی از خالد الحذاء از عکرمہ از حضرت ابن عباس رضی اللہ عنہما، وہ بیان کرتے ہیں

کہ رسول اللہ صلی اللہ علیہ وسلم پانی کی سبیل پر آئے، آپ نے پانی مانگا تو حضرت عباس نے کہا: اے فضل! اپنی امی کے پاس جاؤ اور رسول اللہ صلی اللہ علیہ وسلم کے لیے ان کے پاس سے پانی لاؤ۔ رسول اللہ صلی اللہ علیہ وسلم نے فرمایا: مجھے (اسی سے) پانی پلاؤ، حضرت عباس نے کہا: یا رسول اللہ! لوگ اس پانی میں اپنے ہاتھ ڈال رہے ہیں، آپ نے فرمایا: مجھے اسی میں سے پلاؤ‘ آپ نے اس سبیل سے پانی پیا‘ پھر آپ زمزم پر آئے وہاں لوگ کنویں سے پانی کھینچ کھینچ کر نکال رہے تھے‘ آپ نے فرمایا: تم یہ عمل کرتے رہو تم نیک عمل کر رہے ہو‘ پھر فرمایا: اگر مجھے یہ خطرہ نہ ہوتا کہ تم مغلوب ہو جاؤ گے تو میں (اونٹ سے) اترتا اور کندھے پر رسی رکھ کر پانی کھینچتا‘ آپ نے اپنے کندھے کی طرف اشارہ کیا۔