امام بخاری روایت کرتے ہیں : ہمیں محمد بن بشار نے حدیث بیان کی‘ انہوں نے کہا: مجھے ابوبکر لحفی نے حدیث بیان کی‘ انہوں نے کہا: ہمیں افلح بن حمید نے حدیث بیان کی‘ انہوں نے کہا: میں نے قاسم بن محمد سے سنا از حضرت عائشہ رضی اللہ عنہا‘ انہوں نے بیان کیا:

ہم حج کے مہینوں میں اور حج کی راتوں میں اور حج کے موسم میں نکلے اور مقامِ سرف میں ٹھہرے‘ حضرت عائشہ نے کہا: آپ اپنے اصحاب کی طرف نکلے اور فرمایا: تم میں سے جس شخص کے ساتھ ہدی (قربانی) نہیں ہے‘ پس وہ پسند کرے تو اپنے احرام کو عمرہ کا احرام قرار دے لے اور جس کے ساتھ ہدی ہے وہ ایسا نہ کرے‘ حضرت عائشہ نے بیان کیا: پس آپ کے اصحاب میں سے بعض اپنے احرام کو ترک کرنے والے تھے اور بعض اپنے احرام پر برقرار رہنے والے تھے۔ حضرت عائشہ نے بیان کیا: پس رہے رسول اللہ صلی اللہ علیہ وسلم اور آپ کے اصحاب میں سے چند مرد تو وہ قوت والے تھے اور ان کے ساتھ ہدی (قربانی) تھی‘ وہ عمرہ پر قادر نہ ہوئے۔ حضرت عائشہ نے بیان کیا: پس رسول اللہ صلی اللہ علیہ وسلم میرے پاس آئے‘ اور میں اس وقت رو رہی تھی‘ آپ نے پوچھا: اے بھولی بھالی! کیوں رو رہی ہے؟ میں نے کہا: آپ نے جو اپنے اصحاب سے فرمایا ہے وہ میں نے سن لیا ہے‘ تو میں عمرہ سے روک دی گئی ہوں‘ آپ نے پوچھا: اس کی کیا وجہ ہے؟ میں نے عرض کیا: میں نماز نہیں پڑھ رہی‘ تو آپ نے فرمایا: سو تمہیں کوئی نقصان نہیں ہے‘ تم آدم کی بیٹیوں میں سے ایک عورت ہو‘ اللہ نے تم پر وہ چیز لکھ دی ہے جو ان پر لکھ دی ہے‘ پس‘ تم اپنے حج میں شروع ہو جاؤ‘ عنقریب اللہ تمہیں عمرہ عطا کر دے گا۔ حضرت عائشہ نے کہا: پس ہم اپنے حج کے لیے نکلے‘ حتی کہ ہم منیٰ میں آئے‘ پھر میں پاک ہو گئی‘ پھر میں منیٰ سے نکلی اور میں نے بیت اللہ میں طوافِ زیارت کیا۔ حضرت عائشہ نے بیان کیا: میں دوسری جماعت کے ساتھ نکلی تھی حتیٰ کہ آپ وادی المحصب میں اترے‘ اور ہم بھی آپ کے ساتھ اترے‘ پس آپ نے حضرت عبد الرحمن بن ابو بکر رضی اللہ عنہما کو بلایا اور فرمایا: اپنی بہن کو حرم سے لے کر روانہ ہو‘ تو وہ عمرہ کا احرام باندھیں‘ پھر تم دونوں فارغ ہو کر یہاں آ جاؤ‘ پس میں تم دونوں کا انتظار کروں گا حتىٰ کہ تم دونوں میرے پاس آ جاؤ‘ حضرت عائشہ نے کہا: پس ہم نکلے حتیٰ کہ جب میں فارغ ہو گئی اور طواف (وداع) سے بھی فارغ ہو گئی تو میں آپ کے پاس سحری کے وقت پہنچی‘ آپ نے پوچھا: کیا تم لوگ فارغ ہو گئے؟ میں نے کہا: جی ہاں! پھر آپ نے اپنے اصحاب کو کوچ کرنے کا حکم دیا‘ پھر لوگ روانہ ہوئے‘ سو آپ مدینہ کی طرف متوجہ ہو کر گزرے۔

”ضیر“ کا لفظ ”ضار یضیر ضیرا“ سے ماخوذ ہے اور ”ضار یضور ضورا“ اور ”ضر یضر ضرا“ بھی کہا جاتا ہے۔