امام بخاری روایت کرتے ہیں: ہمیں ابوالیمان نے حدیث بیان کی، انہوں نے کہا: ہمیں شعیب نے خبر دی، انہوں نے کہا: ہمیں ابو الزناد نے خبر دی از الاعرج از حضرت ابو ہریرہ رضی اللہ عنہ انہوں نے بیان کیا کہ رسول اللہ صلی اللہ علیہ وسلم نے فرمایا:

ایک آدمی نے کہا: میں ضرور صدقہ کروں گا، وہ اپنے صدقہ کو لے کر نکلا، پھر اس کو ایک چور کے ہاتھ پر رکھ دیا، صبح کو لوگوں نے کہا: ایک چور پر صدقہ کیا گیا ہے، اس آدمی نے کہا: اللہ کے لیے حمد ہے، میں ضرور صدقہ کروں گا، پھر وہ اپنے صدقہ کو لے کر نکلا، پھر اس کو ایک زانیہ کے ہاتھوں پر رکھ دیا، پھر صبح کو لوگوں نے کہا: زانیہ پر صدقہ کیا گیا ہے، اس نے کہا: اے اللہ! زانیہ پر صدقہ کی وجہ سے تیرے لیے حمد ہے، میں ضرور صدقہ کروں گا، پھر وہ اپنے صدقہ کو لے کر نکلا اور اس کو ایک غنی کے ہاتھ پر رکھ دیا، پھر صبح کو لوگ باتیں کرنے لگے کہ غنی پر صدقہ کیا گیا ہے، اس نے کہا: چور پر اور زانیہ پر اور غنی پر صدقہ کی وجہ سے تیرے لیے حمد ہے، پھر اس نے غیب سے آواز سنی: تم نے جو چور پر صدقہ کیا تھا تو ہو سکتا ہے کہ وہ چوری سے باز آ جائے اور تم نے جو زانیہ پر صدقہ کیا تھا تو ہو سکتا ہے کہ وہ زنا سے باز آ جائے اور تم نے جو غنی پر صدقہ کیا تھا تو ہو سکتا ہے کہ وہ عبرت حاصل کرے اور وہ اس مال سے صدقہ کرے جو اللہ نے اس کو عطا کیا ہے۔