امام بخاری روایت کرتے ہیں: مجھے محمد بن عبدالرحیم نے حدیث بیان کی، انہوں نے کہا: ہمیں عفان بن مسلم نے حدیث بیان کی، انہوں نے کہا: ہمیں وھیب نے حدیث بیان کی از یحییٰ بن سعید بن حیان از ابی زرعہ از حضرت ابو ہریرہ رضی اللہ عنہ کہ ایک اعرابی نبی صلی اللہ علیہ وسلم کے پاس آیا، اس نے کہا: آپ مجھے کوئی ایسا عمل بتائیے کہ جب میں اس عمل کو کر لوں تو جنت میں داخل ہو جاؤں، آپ نے فرمایا: تم اللہ کی عبادت کرو اور اس میں کسی کو شریک نہ کرو اور فرض نماز پڑھو اور فرض زکوٰۃ ادا کرو اور رمضان کے روزے رکھو، اس اعرابی نے کہا: اس ذات کی قسم جس کے قبضہ و قدرت میں میری جان ہے! میں اس پر کوئی زیادتی نہیں کروں گا، جب وہ اعرابی پیٹھ پھیر کر چلا گیا تو آپ نے فرمایا: جس شخص کو اس سے خوشی ہو کہ وہ کسی جنتی آدمی کو دیکھے تو وہ اس آدمی کو دیکھ لے۔

اس حدیث کو ہمیں مسدد نے بیان کیا از یحیی از ابی حیان انہوں نے کہا: مجھے ابوزرعه نے نبی صلی اللہ علیہ وسلم سے اس حدیث کی خبر دی۔