امام بخاری روایت کرتے ہیں: ہمیں موسیٰ بن اسماعیل نے حدیث بیان کی، انہوں نے کہا: ہمیں جریر بن حازم نے حدیث بیان کی، انہوں نے کہا: ہمیں ابو رجاء نے حدیث بیان کی از حضرت سمره بن جندب رضی اللہ عنہ، انہوں نے بیان کیا:

جب نبی صلی اللہ علیہ وسلم نماز پڑھاتے تو ہماری طرف متوجہ ہوتے، پس پوچھتے: تم میں سے آج رات کس نے خواب دیکھا ہے؟ پس اگر کسی نے خواب دیکھا ہوتا تو وہ بیان کرتا، پس جو اللہ تعالیٰ چاہتا وہ آپ فرماتے، سو ایک دن آپ نے ہم سے سوال کیا، پس فرمایا: کیا تم میں سے کسی نے خواب دیکھا ہے؟ ہم نے کہا: نہیں! آپ نے فرمایا: لیکن میں نے آج رات خواب دیکھا کہ دو آدمی میرے پاس آئے، پس وہ دونوں میرا ہاتھ پکڑ کر مجھے ارض مقدسہ میں لے گئے، پس وہاں ایک آدمی بیٹھا ہوا تھا اور دوسرا آدمی لوہے کا آنکڑا (ہک) لے کر کھڑا ہوا تھا۔ راوی نے کہا: ہمارے بعض اصحاب نے موسیٰ سے روایت کیا: وہ کھڑا ہوا شخص اس بیٹھے ہوئے آدمی کے جبڑے میں اس آنکڑے کو داخل کرتا حتیٰ کہ وہ جبڑا اس کی گدی تک چیر دیتا، پھر اس کے دوسرے جبڑے میں اسی طرح آنکڑے کو داخل کرتا اور اس کا پہلا جڑ ٹھیک ہو چکا ہوتا، پھر وہ اس ٹکڑے میں اسی طرح آ نکڑا داخل کرتا‘ میں نے ان دونوں سے پوچھا: یہ کیا ہو رہا ہے؟ انہوں نے کہا: آگے چلیے! پس ہم چل پڑے حتیٰ کہ ہم ایک شخص کے پاس پہنچے جو پیٹھ کے بل لیٹا ہوا تھا اور دوسرا شخص اس کے سر کے پاس پتھر لیے کھڑا ہے اور اس کا سر پھوڑ رہا ہے، پس جب وہ اس کے سر پر ضرب لگاتا تو وہ پتھر لڑھکتا ہوا چلا جاتا‘ پھر وہ اس پتھر کو لینے کے لیے چلا جاتا‘ جب وہ واپس آتا تو اس کا سر پہلے کی طرح ٹھیک ہو چکا ہوتا‘ وہ پھر لوٹ کر اس کا سر پھوڑتا‘ میں نے ان دونوں سے پوچھا: یہ کیا ہو رہا ہے؟ انہوں نے کہا: آگے چلیے! پس ہم آگے گئے تو تنور کی طرح ایک سوراخ تھا‘ وہ اوپر سے تنگ تھا اور نیچے سے فراخ تھا‘ اس کے نیچے آگ جل رہی تھی‘ پھر جب وہ آگ اوپر اٹھتی تو اس میں جو لوگ تھے وہ اس تنور سے نکلنے کے قریب ہوتے اور جب وہ آگ بجھ جاتی تو پھر وہ لوگ نیچے چلے جاتے‘ اس میں برہنہ مرد اور عورتیں تھیں‘ میں نے پوچھا: یہ کیا ہو رہا ہے؟ انہوں نے کہا: آگے چلیے! پس ہم آگے گئے‘ حتیٰ کہ ہم خون کے دریا پر آئے‘ دریا کے وسط میں ایک شخص کھڑا ہوا تھا‘ یزید نے اور وہب بن جریر نے کہا از جریر بن حازم: دریا کے کنارے ایک اور شخص تھا جس کے سامنے پتھر تھے‘ پھر وہ شخص آگے بڑھا جو دریا میں تھا جب وہ (دریا سے) نکلنے کا ارادہ کرتا تو دوسرا شخص اس کے منہ پر پتھر کھینچ کر مارتا اور اس کو اسی جگہ لوٹا دیتا‘ پس جب بھی وہ نکلنے کے لیے آتا تو وہ دوسرا شخص اس کے منہ پر پتھر مارتا‘ پھر وہ اسی جگہ لوٹ جاتا‘ میں نے ان دونوں سے پوچھا: یہ کیا ہو رہا ہے؟ انہوں نے کہا: آگے چلیے! پس ہم آگے گئے حتیٰ کہ ہم ایک سرسبز باغ کے پاس پہنچے‘ اس میں بہت بڑا درخت تھا‘ اس کی جڑ میں ایک بوڑھا شخص بیٹھا تھا اور بچے بیٹھے تھے اور ایک شخص درخت کے قریب تھا‘ وہ اپنے سامنے آگ جلا رہا تھا‘ ان دونوں نے مجھے اس درخت پر چڑھایا اور مجھے ایک گھر میں داخل کر دیا‘ اس سے زیادہ حسین گھر میں نے اس سے پہلے نہیں دیکھا تھا‘ اس میں بوڑھے مرد تھے اور جوان مرد تھے اور عورتیں تھیں اور بچے تھے‘ پھر ان دونوں نے مجھے اس گھر سے نکالا پھر مجھے اس درخت پر چڑھایا پھر مجھے ایک اور گھر میں داخل کیا جو اس سے زیادہ حسین اور افضل تھا اس میں بوڑھے اور جوان تھے میں نے کہا: تم دونوں نے مجھے ساری رات گھمایا ہے اب مجھے بتاؤ کہ میں نے کیا کچھ دیکھا ہے ان دونوں نے کہا: ہاں! رہا وہ شخص جس کو آپ نے دیکھا کہ اس کے جبڑے کو توڑا جا رہا تھا یہ بہت جھوٹا تھا یہ جھوٹی خبریں دیتا تھا جو اس سے نقل کی جاتی تھیں حتیٰ کہ ساری دنیا میں پھیل جاتی تھیں سو اس کے ساتھ قیامت تک وہی کیا جاتا رہے گا جو آپ نے دیکھا ہے اور جس شخص کو آپ نے دیکھا کہ اس کا سر پھوڑا جا رہا تھا یہ وہ شخص ہے جس کو اللہ نے قرآن کا علم دیا تھا یہ رات کو سو جاتا تھا اور دن میں اس پر عمل نہیں کرتا تھا اس کے ساتھ قیامت تک اسی طرح کیا جاتا رہے گا اور جن لوگوں کو آپ نے تنور میں دیکھا وہ زنا کرنے والے تھے اور جن لوگوں کو آپ نے خون کے دریا میں دیکھا وہ سود کھانے والے تھے اور جس بوڑھے شخص کو آپ نے درخت کی جڑ میں دیکھا وہ حضرت ابراہیم علیہ السلام تھے اور جو بچے ان کے گرد تھے وہ لوگوں کی (نابالغ) اولاد ہیں اور جو شخص آگ جلا رہا تھا وہ دوزخ کا داروغہ مالک ہے اور پہلا گھر جو آپ نے دیکھا جس میں آپ داخل ہوئے تھے وہ عام مسلمانوں کا گھر ہے اور رہا یہ گھر تو یہ شہداء کا گھر ہے اور میں جبریل ہوں اور یہ میکائیل ہیں آپ اپنا سر اٹھائیں پس میں نے اپنا سر اٹھایا تو میرے اوپر بادل کی طرح تھا ان دونوں نے کہا: یہ آپ کا ٹھکانا ہے میں نے کہا: مجھے چھوڑو! میں اپنے گھر میں داخل ہوں ان دونوں نے کہا: ابھی آپ کی عمر باقی ہے جس کو آپ نے مکمل نہیں کیا پس اگر آپ نے اپنی عمر کی تکمیل کر لی تو آپ اپنے ٹھکانے میں جائیں گے۔