امام بخاری روایت کرتے ہیں: ہمیں اسماعیل نے حدیث بیان کی، انہوں نے کہا: مجھے امام مالک نے حدیث بیان کی از عبداللہ بن دینار از حضرت عبداللہ بن عمر رضی اللہ عنہما کہ رسول اللہ ﷺ نے فرمایا:

درختوں میں سے ایک درخت ہے، جس کے پتے نہیں گرتے اور وہ مسلم کی مثل ہے، مجھے بتاؤ وہ کون سا درخت ہے؟ پس لوگوں کے ذہن جنگل کے درختوں میں چلے گئے اور میرے ذہن میں یہ آیا کہ وہ کھجور کا درخت ہے، پھر مجھے (بتانے سے) حیاء آئی، صحابہ نے کہا: یا رسول اللہ! ہمیں بتائیے وہ کون سا درخت ہے؟ تب رسول اللہ ﷺ نے فرمایا: وہ کھجور کا درخت ہے، حضرت عبداللہ بن عمر نے کہا: میں نے اپنے والد کو بتایا جو میرے ذہن میں آیا تھا، انہوں نے کہا: اگر تم اس وقت بتا دیتے تو میرے لیے یہ اس سے زیادہ محبوب تھا کہ مجھے اتنا اور اتنا مل جاتا۔