امام بخاری روایت کرتے ہیں: ہمیں بشر بن الحکم نے حدیث بیان کی‘ انہوں نے کہا: ہمیں سفیان بن عیینہ نے حدیث بیان کی‘ انہوں نے کہا: ہمیں اسحاق بن عبداللہ بن ابی طلحہ نے خبر دی‘ انہوں نے حضرت انس بن مالک رضی اللہ عنہ سے سنا‘ وہ بیان کرتے ہیں کہ

حضرت ابوطلحہ رضی اللہ عنہ کا بیٹا بیمار ہو گیا‘ پس وہ فوت ہو گیا اور حضرت ابوطلحہ گھر سے نکلے ہوئے تھے‘ جب ان کی بیوی نے یہ دیکھا کہ بچہ فوت ہو گیا ہے تو انہوں نے اس کو غسل دیا اور کفن پہنایا اور اس کو گھر کے ایک کونے میں رکھ دیا‘ جب حضرت ابوطلحہ آئے اور پوچھا: بچہ کیسا ہے؟ تو انہوں نے کہا: وہ پرسکون ہے اور مجھے امید ہے وہ راحت پا چکا ہے‘ اور حضرت ابوطلحہ نے گمان کیا کہ وہ سچی ہیں‘ حضرت انس نے کہا: انہوں نے رات گزاری‘ جب صبح ہوئی تو غسل کیا‘ جب وہ گھر سے باہر نکلنے لگے تو ان کی بیوی نے انہیں بتایا کہ بچہ فوت ہو چکا ہے‘ پس انہوں نے نبی صلی اللہ علیہ وسلم کے ساتھ نماز پڑھی‘ پھر انہوں نے نبی صلی اللہ علیہ وسلم کو بتایا کہ ان دونوں کے ساتھ رات کو کیا ہوا ہے‘ تب نبی صلی اللہ علیہ وسلم نے فرمایا: امید ہے کہ اللہ تعالیٰ تمہارے رات کے معاملے میں برکت دے گا۔

سفیان نے کہا: پس انصار کے ایک شخص نے کہا: میں نے دیکھا کہ ان کے نو بیٹے ہوئے اور وہ سب قرآن مجید کے قاری تھے۔