امام بخاری روایت کرتے ہیں: ہمیں قیس بن حفص نے حدیث بیان کی انہوں نے کہا: ہمیں عبدالواحد نے حدیث بیان کی انہوں نے کہا: ہمیں الاعمش سلیمان نے حدیث بیان کی از ابراہیم از علقمہ از حضرت عبداللہ بن مسعود رضی اللہ عنہ انہوں نے بیان کیا کہ

میں نبی ﷺ کے ساتھ مدینہ کے کھنڈرات میں جا رہا تھا اور آپ لاٹھی پر ٹیک لگاتے تھے وہ آپ کے ساتھ تھی، آپ یہود کے ایک گروہ کے پاس سے گزرے انہوں نے ایک دوسرے سے کہا: ان سے روح کے متعلق سوال کرو۔ ان میں سے بعض نے کہا: سوال نہ کرو یہ کوئی ایسا جواب نہ دیں جس کو تم ناپسند کرو دوسروں نے کہا: ہم ان سے ضرور سوال کریں گے، پھر ان میں سے ایک شخص نے کھڑے ہو کر کہا: یا ابا القاسم! روح کی کیا حقیقت ہے؟ پس آپ خاموش رہے، میں نے (دل میں) کہا: آپ کی طرف وحی کی جا رہی ہے، پس میں کھڑا ہو گیا، جب آپ سے نزولِ وحی کی کیفیت دور ہو گئی تو آپ نے پڑھا: "اور یہ لوگ آپ سے روح کے متعلق سوال کرتے ہیں، آپ کہیے کہ روح میرے رب کے امر سے ہے اور تم کو جو بھی علم دیا گیا ہے وہ تھوڑا ہے" (بنی اسرائیل: ۸۵)۔ الاعمش نے کہا: ہماری قراءت میں اسی طرح ہے۔