امام بخاری روایت کرتے ہیں: ہمیں یحییٰ بن بکیر نے حدیث بیان کی، انہوں نے کہا: ہمیں لیث نے حدیث بیان کی از عقیل از ابن شہاب، انہوں نے کہا: مجھے خارجہ بن زید بن ثابت نے خبر دی کہ

حضرت ام العلاء رضی اللہ عنہا انصار کی ایک خاتون تھیں، انہوں نے نبی صلی اللہ علیہ وسلم سے بیعت کی تھی، وہ بیان کرتی ہیں کہ مہاجرین کو قرعہ اندازی سے تقسیم کیا گیا، پس ہمارے حصہ میں حضرت عثمان بن مظعون رضی اللہ عنہ آئے، پس ہم نے ان کو اپنے گھروں میں ٹھہرایا، پس ان کو بہت شدید درد ہو گیا، جس میں وہ فوت ہو گئے، پس جب وہ فوت ہو گئے تو ان کو غسل دیا گیا اور انہیں ان کے کپڑوں میں کفن پہنایا گیا، رسول اللہ صلی اللہ علیہ وسلم تشریف لائے تو میں نے کہا: اے ابو السائب! تم پر اللہ کی رحمت ہو، میری تمہارے متعلق یہ شہادت ہے کہ بے شک اللہ نے تمہاری تکریم کی ہے، پس نبی صلی اللہ علیہ وسلم نے فرمایا: تمہیں کس نے بتایا کہ اللہ نے ان کی تکریم کی ہے؟ میں نے عرض کیا: یا رسول اللہ! آپ پر میرے باپ فدا ہوں! پھر اللہ کس کی تکریم کرے گا؟ پس آپ نے فرمایا: رہے وہ تو ان کے پاس یقینی بات آ چکی ہے اور اللہ کی قسم! میں ان کے لیے خیر کی توقع رکھتا ہوں اور اللہ کی قسم! میں ازخود نہیں جانتا حالانکہ میں اللہ کا رسول ہوں کہ میرے ساتھ کیا کیا جائے گا۔ حضرت ام العلاء نے کہا: پس اللہ کی قسم! میں اس کے بعد کبھی بھی کسی کی تعریف نہیں کرتی۔

ہمیں سعید بن عفیر نے حدیث بیان کی، انہوں نے کہا: ہمیں لیث نے اس کی مثل حدیث بیان کی اور نافع بن یزید نے کہا از عقیل ”ما یفعل بہ“ اور شعیب اور عمرو بن دینار اور معمر نے اس حدیث کی متابعت کی۔