امام بخاری روایت کرتے ہیں: ہمیں عبداللہ بن محمد نے حدیث بیان کی، انہوں نے کہا: ہمیں سفیان نے حدیث بیان کی، انہوں نے کہا: ہمیں عمرو نے حدیث بیان کی، انہوں نے کہا: مجھے سعید بن جبیر نے خبر دی، انہوں نے بیان کیا: میں نے حضرت ابن عباس رضی اللہ عنہما سے کہا کہ

بے شک نوف بکالی یہ زعم کرتا ہے (قرآن میں حضرت خضر کے ساتھ) جس موسیٰ کا ذکر ہے، وہ بنی اسرائیل کے موسیٰ نہیں ہیں، وہ کوئی اور موسیٰ ہیں۔ حضرت ابن عباس نے فرمایا: وہ اللہ کا دشمن جھوٹ بولتا ہے۔ ہمیں حضرت ابی بن کعب رضی اللہ عنہ نے نبی ﷺ سے یہ حدیث روایت کی ہے کہ حضرت موسیٰ علیہ السلام بنی اسرائیل میں خطبہ دے رہے تھے، ان سے سوال کیا گیا کہ لوگوں میں سب سے بڑا عالم کون ہے؟ انہوں نے کہا: میں سب سے بڑا عالم ہوں۔ اللہ عزوجل نے ان پر عتاب فرمایا کیونکہ انہوں نے علم کو اللہ کی طرف نہیں لوٹایا۔ تب اللہ عزوجل نے ان کی طرف یہ وحی کی کہ بے شک میرے بندوں میں سے ایک بندہ مجمع البحرین میں ہے، وہ آپ سے بڑا عالم ہے۔ حضرت موسیٰ نے کہا: اے میرے رب! میں اس تک کیسے واصل ہوں گا؟ ان سے کہا گیا کہ آپ ایک ٹوکری میں (بھنی ہوئی) مچھلی رکھ لیں، جس جگہ اس مچھلی کو گم پائیں گے، وہیں خضر ہوں گے۔ حضرت موسیٰ روانہ ہوئے اور ان کے ساتھ ان کے شاگرد حضرت یوشع بن نون بھی روانہ ہوئے اور انہوں نے ایک ٹوکری میں (بھنی ہوئی) مچھلی رکھ لی، حتیٰ کہ جب وہ دونوں ایک چٹان کے پاس پہنچے تو مان دونوں اس پر اپنے سر رکھے اور سو گئے، پس وہ مچھلی ٹوکری سے نکلی اور اس نے سمندر میں سرنگ کی مثل اپنا راستہ بنا لیا (الکہف: ۶۱) اور موسیٰ اور ان کے شاگرد کے لیے یہ بہت عجیب بات تھی۔ پھر وہ دونوں بقیہ رات اور دن تک چلتے رہے، جب صبح ہوئی تو حضرت موسیٰ نے اپنے شاگرد سے کہا: "ہمارا ناشتا لاؤ، ہمیں اس سفر سے تھکاوٹ ہوئی ہے" (الکہف: ۶۲) اور موسیٰ علیہ السلام کو تھکاوٹ اسی وقت محسوس ہوئی تھی، جب انہوں نے اس جگہ سے تجاوز کیا تھا، جس جگہ انہیں جانے کا حکم دیا گیا تھا۔ پھر ان کے شاگرد نے ان سے کہا: "کیا آپ نے نہیں دیکھا جب ہم چٹان سے ٹیک لگا کر آرام کر رہے.تھے، وہاں میں مچھلی بھول گیا تھا" (الکہف: ۶۳) حضرت موسیٰ نے کہا: "ہم اسی کو تلاش کر رہے تھے، پس وہ اپنے قدموں کے نشان تلاش کرتے ہوئے لوٹے" (الکہف: ۶۴) جب وہ اس چٹان تک پہنچے تو وہاں ایک شخص چادر اوڑھے ہوئے تھے یا کہا: اس نے چادر سے اپنے آپ کو چھپایا ہوا تھا، حضرت موسیٰ نے ان کو سلام کیا، پس حضرت خضر نے کہا: تمہاری زمین میں سلامتی کہاں ہے؟ پس انہوں نے کہا: میں موسیٰ ہوں! انہوں نے کہا: بنی اسرائیل کے موسیٰ؟ انہوں نے کہا: جی ہاں! کہا: "کیا میں اس پر آپ کی پیروی کروں کہ آپ مجھے وہ سکھا دیں جو نیک علم آپ کو سکھایا گیا ہے" خضر نے کہا: آپ میرے ساتھ ہرگز صبر نہیں کر سکیں گے (الکہف: ۶۶-۶۷) اے موسیٰ! میرے پاس اللہ کے علم میں سے وہ علم ہے جس کی اللہ نے مجھے تعلیم دی ہے، جس کا آپ کو علم نہیں ہے اور آپ کے پاس اللہ کا وہ علم ہے جس نے اللہ نے آپ کو تعلیم دی ہے جس کا مجھے علم نہیں ہے، حضرت موسیٰ نے کہا: ان شاء اللہ! آپ مجھے صبر کرنے والا پائیں گے اور میں کسی بات میں آپ کی نافرمانی نہیں کروں گا" (الکہف: ۶۹) پھر وہ دونوں روانہ ہوئے اور چلتے چلتے ساحل سمندر پر پہنچے، وہاں ان دونوں کے لیے کوئی کشتی نہیں تھی، پھر ان دونوں کے پاس سے ایک کشتی گزری، انہوں نے ان سے بات کی کہ وہ ان کو سوار کر لیں، انہوں نے حضرت خضر کو پہچان لیا، پس انہوں نے بغیر کسی معاوضہ کے ان دونوں کو سوار کر لیا، پھر ایک چڑیا آکر کشتی کے کنارے بیٹھ گئی، اس نے سمندر میں ایک چونچ یا دو چونچیں ماریں، حضرت خضر نے کہا: اے موسیٰ! میرا علم اور آپ کا علم اللہ کے مقابلہ میں ایسا ہے جیسے سمندر میں اس چڑیا کی ایک چونچ ہے، پھر حضرت خضر نے کشتی کے تختوں میں سے ایک تختہ کا ارادہ کیا اور اس کو اکھاڑ دیا، حضرت موسیٰ نے کہا: ان لوگوں نے بغیر معاوضہ کے ہمیں کشتی میں سوار کیا اور آپ نے اس کا تختہ اکھاڑ دیا تاکہ اس میں بیٹھنے والوں کو غرق کر دیں! حضرت خضر نے کہا: کیا میں نے نہیں کہا تھا کہ آپ میرے ساتھ ہرگز صبر نہیں کر سکیں گے؟ موسیٰ نے کہا: آپ میری بھول پر میری گرفت نہ کیجیے"(الکہف: ۷۳-۷۴) سو پہلی بار حضرت موسیٰ سے بھول ہو گئی، پھر وہ دونوں روانہ ہو گئے، پس وہاں ایک لڑکا لڑکوں کے ساتھ کھیل رہا تھا، حضرت خضر نے اس لڑکے کا سر اوپر کی طرف سے پکڑا اور اپنے ہاتھ سے اس کا سر دھڑ سے الگ کر دیا، پھر حضرت موسیٰ نے کہا: "کیا آپ نے ایک بے قصور جان کو بغیر کسی جان کے عوض کے قتل کر ڈالا" (الکہف: ۷۴) خضر نے کہا: کیا میں نے آپ سے پہلے ہی نہیں کہا تھا کہ آپ میرے ساتھ ہرگز صبر نہیں کر سکیں گے (الکہف: ۷۵) ابن عیینہ نے کہا: اس میں زیادہ تاکید ہے، پھر وہ دونوں روانہ ہو گئے حتیٰ کہ جب وہ ایک دیہات والوں کے پاس پہنچے تو دیہات والوں سے کھانا مانگا، انہوں نے ان دونوں کو مہمان بنانے سے انکار کر دیا، پھر ان دونوں نے وہاں ایک دیوار دیکھی جو گرا چاہتی تھی، انہوں نے اس کی مرمت کر دی (الکہف: ۷۷) خضر نے اپنے ہاتھ سے اس کی مرمت کی، تب حضرت موسیٰ نے ان سے کہا: "اگر آپ چاہتے تو اس پر کوئی معاوضہ لے لیتے" حضرت خضر نے کہا: بس! یہ میرے اور آپ کے درمیان جدائی ہے (الکہف: ۷۷-۷۸) نبی ﷺ نے فرمایا: اللہ حضرت موسیٰ پر رحم فرمائے، ہم چاہتے تھے اگر وہ صبر کرتے حتیٰ کہ ان دونوں کے مزید واقعات ہم پر بیان کیے جاتے۔