(امام بخاری روایت کرتے ہیں): ہمیں یحییٰ بن بکیر نے حدیث بیان کی، انہوں نے کہا: ہمیں لیث نے حدیث بیان کی از جعفر از الاعرج، انہوں نے کہا کہ حضرت ابو ہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا:

جب نماز کی اذان دی جاتی ہے تو شیطان گوز مارتا ہوا پیٹھ پھیر لیتا ہے حتیٰ کہ وہ اذان نہیں سنتا، پس جب مؤذن خاموش ہو جاتا ہے تو پھر آ جاتا ہے، پھر جب اقامت کہی جاتی ہے تو پھر پیٹھ پھیر لیتا ہے، پھر جب مؤذن خاموش ہو جاتا ہے تو پھر آ جاتا ہے، پھر مسلسل انسان سے کہتا رہتا ہے کہ فلاں چیز کو یاد کر، جس کو وہ یاد نہیں رکھتا تھا، حتیٰ کہ انسان کو پتا نہیں چلتا کہ اس نے کتنی رکعت پڑھی ہیں، ابو سلمہ بن عبد الرحمن نے کہا: جب تم میں سے کوئی شخص اس طرح کرے تو وہ بیٹھے ہوئے سہو کے دو سجدے کرے۔

اور ابو سلمہ نے اس حدیث کو حضرت ابو ہریرہ رضی اللہ عنہ سے سنا ہے۔