(امام بخاری روایت کرتے ہیں): ہمیں ابو معمر نے حدیث بیان کی، انہوں نے کہا: ہمیں عبدالوارث نے حدیث بیان کی، انہوں نے کہا: ہمیں کثیر بن شنظیر نے حدیث بیان کی از عطاء بن ابی رباح از حضرت جابر بن عبداللہ رضی اللہ عنہما، انہوں نے بیان کیا کہ

مجھے رسول اللہ صلی اللہ علیہ وسلم نے کسی کام سے بھیجا، میں گیا، پھر واپس آیا اور میں وہ کام کر چکا تھا، پس میں نبی صلی اللہ علیہ وسلم کی خدمت میں حاضر ہوا اور میں نے آپ کو سلام کیا تو آپ نے مجھے جواب نہیں دیا، اس سے میرے دل میں اتنا رنج ہوا کہ اللہ ہی اس کو زیادہ جانتا ہے، میں نے دل میں کہا: شاید رسول اللہ صلی اللہ علیہ وسلم مجھ پر اس وجہ سے ناراض ہوئے ہیں کہ میں نے کام میں دیر کر دی۔ میں نے آپ کو پھر سلام کیا، آپ نے پھر مجھے جواب نہیں دیا، میرے دل میں اب پہلی مرتبہ سے زیادہ رنج ہوا، میں نے پھر سلام کیا تو آپ نے مجھے جواب دیا، پھر فرمایا: مجھے تمہارے سلام کا جواب دینے سے صرف یہ چیز مانع تھی کہ میں نماز پڑھ رہا تھا، اور آپ اپنی سواری پر غیر قبلہ کی طرف نماز پڑھ رہے تھے۔