امام بخاری روایت کرتے ہیں: ہمیں قتیبہ نے حدیث بیان کی‘ انہوں نے کہا: ہمیں عبدالواحد نے حدیث بیان کی از الاعمش‘ انہوں نے کہا: ہمیں ابراہیم نے حدیث بیان کی‘ انہوں نے کہا: میں نے عبدالرحمن بن یزید سے سنا‘ وہ بیان کرتے ہیں کہ

ہمیں حضرت عثمان بن عفان رضی اللہ عنہ نے منیٰ میں، چار رکعت نماز پڑھائی‘ حضرت عبداللہ بن مسعود رضی اللہ عنہ کو یہ بتایا گیا تو انہوں نے کہا: ”اِنَّا لِلّٰهِ وَاِنَّآ اِلَيْهِ رٰجِعُوْنَ“ (البقرہ:۱۵۶) پھر حضرت ابن مسعود نے کہا: میں نے رسول اللہ صلی اللہ علیہ وسلم کے ساتھ منیٰ میں دو رکعت نماز پڑھی ہے‘ اور حضرت ابوبکر رضی اللہ عنہ کے ساتھ منیٰ میں دو رکعت نماز پڑھی ہے اور حضرت عمر رضی اللہ عنہ کے ساتھ منیٰ میں دو رکعت نماز پڑھی ہے‘ پس کاش! ان چار رکعات کے بجائے میرا حصہ دو رکعتیں ہوتیں‘ جو مقبول ہیں۔