(امام بخاری روایت کرتے ہیں:) ہمیں عبداللہ بن یوسف نے حدیث بیان کی، انہوں نے کہا: مجھے لیث نے حدیث بیان کی، انہوں نے کہا: مجھے سعید نے حدیث بیان کی از ابی شریح،

انہوں نے عمرو بن سعید سے اس وقت کہا جب وہ مکہ کی طرف لشکر بھیج رہا تھا: اے امیر! میں آپ سے ایک حدیث بیان کرتا ہوں، جس کو کل نبی صلی اللہ علیہ وسلم نے فتح مکہ کے دن کھڑے ہو کر فرمایا تھا، اس حدیث کو میرے دونوں کانوں نے سنا اور میرے دل نے اس کو یاد رکھا اور جس وقت آپ نے وہ حدیث فرمائی میری دونوں آنکھوں نے آپ کو دیکھا، آپ نے اللہ تعالیٰ کی حمد و ثنا کی، پھر فرمایا: بے شک مکہ کو اللہ نے حرم قرار دیا ہے، اس کو لوگوں نے حرام قرار نہیں دیا، سو جو شخص بھی اللہ پر اور یومِ آخرت پر ایمان لایا ہو، اس کے لیے مکہ میں خون بہانا جائز نہیں ہے اور نہ مکہ کے درخت کو کاٹنا جائز ہے۔ پس اگر کوئی شخص مکہ میں رسول اللہ صلی اللہ علیہ وسلم کے قتال کرنے سے قتال کی رخصت پر استدلال کرے تو اس سے کہو: بے شک اللہ نے اپنے رسول کو اجازت دی تھی اور تمہیں اجازت نہیں دی ہے اور مجھے اس میں صرف ایک ساعت میں اجازت دی تھی، آج اس کی حرمت پھر لوٹ آئی ہے، جیسا کہ کل اس کی حرمت تھی اور شاہد (حاضر) کو چاہیے کہ غائب کو (یہ حدیث) پہنچادے۔

پھر ابوشریح سے پوچھا گیا کہ (اس کے جواب میں) عمرو بن سعید نے کیا کہا؟ اس نے کہا: اے ابوشریح! میں اس مسئلہ کو تم سے زیادہ جانتا ہوں، بے شک مکہ کسی نافرمان کو پناہ نہیں دیتا اور نہ قتل کر کے بھاگنے والے کو اور نہ کسی چوری کر کے بھاگنے والے کو۔