امام بخاری روایت کرتے ہیں: ہمیں قتیبہ بن سعید نے حدیث بیان کی، انہوں نے کہا: ہمیں اسماعیل بن جعفر نے حدیث بیان کی از شریک از حضرت انس بن مالک رضی اللہ عنہ وہ بیان کرتے ہیں کہ

ایک شخص جمعہ کے دن مسجد میں اس دروازہ سے داخل ہوا جو دارالقضاء کی طرف ہے، اور رسول اللہ صلی اللہ علیہ وسلم اس وقت کھڑے ہوئے خطبہ دے رہے تھے، اس نے کھڑے ہو کر رسول اللہ صلی اللہ علیہ وسلم کی طرف منہ کیا پھر کہا: یا رسول اللہ! اموال ہلاک ہو گئے اور راستے منقطع ہو گئے لہٰذا آپ اللہ سے دعا کیجئے کہ وہ ہم پر بارش نازل کرے پھر رسول اللہ صلی اللہ علیہ وسلم نے اپنے ہاتھوں کو بلند کیا، پھر دعا کی: اے اللہ! ہم پر بارش نازل فرما! اے اللہ! ہم پر بارش نازل فرما! اے اللہ! ہم پر بارش نازل فرما! حضرت انس نے کہا: اور اللہ کی قسم! ہم آسمان پر اکٹھے بادل دیکھ رہے تھے نہ متفرق بادل اور نہ ہمارے اور سلع پہاڑ کے درمیان (کوئی بادل کسی اوٹ میں تھا) اور نہ کسی حویلی اور کسی گھر کے درمیان پھر سلع پہاڑ کے پیچھے سے ڈھال کی طرح بادل امڈ آئے اور جب وہ بادل آسمان کے وسط میں پہنچے تو منتشر ہو گئے پھر برسنے لگے اور اللہ کی قسم! ہم نے چھ دن تک سورج نہیں دیکھا پھر جمعہ کے دن ایک شخص اسی دروازہ سے داخل ہوا اور اس وقت رسول اللہ صلی اللہ علیہ وسلم کھڑے ہوئے خطبہ دے رہے تھے پس وہ آپ کی طرف منہ کر کے کھڑا ہوا پس اس نے کہا: یا رسول اللہ! اموال ہلاک ہو گئے اور راستے منقطع ہو گئے پس آپ اللہ سے دعا کیجئے کہ بارش کو ہم سے روک لے پھر رسول اللہ صلی اللہ علیہ وسلم نے اپنے ہاتھوں کو بلند کیا پھر دعا کی: اے اللہ! ہمارے اردگرد برسا، ہم پر نہ برسا، اے اللہ! ٹیلوں پر اور پہاڑیوں پر اور وادیوں کے بطن میں اور درختوں کے اگنے کی جگہوں پر برسا حضرت انس نے کہا: پھر بارش روک دی گئی اور ہم دھوپ میں چل رہے تھے۔

شریک نے کہا: میں نے حضرت انس بن مالک سے پوچھا: کیا یہ وہی پہلا شخص تھا؟ حضرت انس نے کہا: مجھے معلوم نہیں۔