امام بخاری روایت کرتے ہیں: ہمیں عبداللہ بن مسلمہ نے حدیث بیان کی از امام مالک از شریک بن عبداللہ از حضرت انس رضی اللہ عنہ انہوں نے کہا کہ

ایک شخص نبی صلی اللہ علیہ وسلم کے پاس آیا، پس اس نے کہا: مویشی ہلاک ہو گئے اور راستے منقطع ہو گئے، تو آپ نے دعا کی، پھر ہم پر ایک جمعہ سے دوسرے جمعہ تک بارش ہوتی رہی، پھر وہ شخص آیا، پس اس نے کہا: مکانات گر گئے اور راستے منقطع ہو گئے اور مویشی ہلاک ہو گئے، پس آپ اللہ سے دعا کیجئے کہ وہ اس بارش کو روک لے، پھر رسول اللہ صلی اللہ علیہ وسلم کھڑے ہوئے، پس دعا کی: اے اللہ! ٹیلوں پر اور پہاڑیوں پر اور وادیوں پر اور درختوں کے اگنے کی جگہوں پر بارش نازل فرما! پس بارش مدینہ سے اس طرح منقطع ہو گئی جیسے کپڑا منقطع ہو جاتا ہے۔